اللهم ولى على مصر من يصلح حالها يارب العالمين
صاحب رأى
عن طريق احدى غرف الدردشه على الانترنت وجدت عنوان لمدونه اسمها (همسات حائره) ، وبعد تصفحى للمدونه وجدتها ملكا لشاعره جديده ، ولدت لتمتعنا بقلمها الرائع ، اتمنى ان تستمر فى الكتابه ولا تنقطع ابدا لان بانقطاعها سنخسر الكثير .
وجدت فى احدى مواضيع المدونه ما يرشدنى الى قصيده للشاعره المصريه صاحبه المدونه الجميله .
الحرافيش ليست الا شعرا وكلام جميل نابع من قلب مصرى , بهذا الاسم وجدت عنوان القصيده (الحرافيش) .
احببت ان اقدم اليكم هذه القصيده بعد استأذان الكاتب لحمايه الحقوق الفكريه .
اليكم قصيده الحرافيش


ياللى رايح وياللى جاى

ياللى عارف باللى جاى

وياللى عارف باللى فات

ياللى عارف انه مات

التاريخ والذكريات

وابتدا واقع جديد

الدهب يصبح حديد

والدم يبقى صديد

والقرش يبقى عنيد

والضمير يصبح وئيد

والمولود لما يفتح عنية

يفقعوها بسيخ حديد

ياللى واخد عالسكات

ياللى عايش فذكريات

ياللى فحياتك كل همك

انك على حالك تطلع نكات

يا ترى انت صحيح

يا ترى انت صريح

واجة نفسك بنفسك

وخلى التليج عندك يسيح

جدك كان فلاح فصيح

وكان لسانه ديما صريح

جدك كان ربان ونوتى

وعمرة مخاف من موج و ريح

جدك كان بيقول مثل مش شنكوتى

يا واكل قوتى يا ناوى على موتى

يا واكل قوتى يا ناوى على موتى

يا ناوى على موتى طال سكوتى

طال سكوتى و الانتظار

طال ليلى ونفسى فنهار

دا بلدى فيها اطول الانهار

وديما الخير فيها فكل دار

ايه سبب وكستنا والانهيار

وليه نربط نفسنا بدولار

والخواجة الامريكانى

فوشنا بينفخ سيجار

يا ترى لامتى السكوت

والفكرة اللى بتخلينا نموت

دا اكل وشبع واللى جاى هايكون هلفوت

من امتى الجشع ليه شبع

ومن امتى الطماع بيبقى ورع

الجشع بيجيب جشع

والطمعان بيذيد طمع

فككم بقا عقلى اتخلع

من سكوت ومن جمود

ومن ضمير مالهوشى صوت

صوت بزمتك دا صوت

بص شوف فى الانتخابات

من غير تريقة ولا اشتغالات

البلطجية والسادة الظباط

فاليوم دهوا بيكونوا اخوات

وخلى صوتك يعدى يفوت

هاتنضرب بالشلوت

ومش بعيد مالضرب تموت

وتيجى تقلى صوت

صوت بقا دا صوت

صوتك تملى سويط وعياط

ياما فخناقة وتفرد عضلات

ويا سلام لو مع الاخوات

تعمل رجولة وسبع الشات

وكأن الرجولة فسب البنات

بكفايه بقا شبعنا اشتغالات

ناقصلك طرحة وكومبليزون

طال اللسان والصوت مكتوم

وتسمع كلام مالهوش مضمون

وهاتيك سب بدون اسباب

الا الضياع والعيشة الهباب

عشان ضميرنا بقا فغياب

بنطلع على الغلابة بس الانياب

راجل دى كلمه وليها معنى

مش بالسباب وجعتوا دماغنا

راجل ترجل مشى عالارض

عارف حقوقة وعارف الفرض

عارف الشهامه وحافظ العرض

مش زيكم مقضيها بالطول والعرض

راجل دا ابويا واخويا

هو اللى يقدر يحمينى

مش زيك من علف الصويا

ناقصك ملاية واشارب باويا

ونازل شتيمة محمينى

راجل دا انسان موزون

كلامه تملى ليه مضمون

والكلمة تطلع بالف حساب

وعمرة مكان طويل الانياب

ولا يقل ادبة باى سباب

راجل دا كان زمان بيعدى

من ايام جدك وجدى

دلوقتى بقا افلام هندى

متسكت بقا وكفايه تحدى

حتى التحدى فافلامنا

نجيب محفوظ قدمهالنا

عن حرامية سرقم مالنا

وهانو حريمنا وضربوا عيالنا

طلعلهم انسان حرفوش

قلب برىء مفوهشى رتوش

داق المرار وسنين ساكت

لحد النفوس بالهموم شاخت

قالك انا هافضل ساكت

لحد ماموت بالشلوت

مسك نبوتة واتحدى

وهاتيك ضرب بكل مودة

لرئوس الفتوات فالحتة

مش بالشتيمة ولا بالفته

ولا بفضايح فى الحتة

اعرف عدوك وازاى تلاقية

مش اى حد تفش غلك فيه

دنتا الامل ربنا يحمية

ومن كل قلبنا ربنا يهديه

ارجع لاصلك خليك راجل

ومتبقاش علينا حمام زاجل

ارجع لاصلك خليك راجل

دا طلب ضرورى طلب عاجل

ارجع لاصلك خليك راجل

عدل طريقك متبقاش جاهل

ارجع لاصلك خليك راجل

عيشة الحرية مش بالساهل

عيشة الحرية مش بالساهل

* للكاتبه :- ريم محمود صاحبه مدونه همسات حائره

اتمنى تكونوا استمتعتم بيها مثلى واكتر .
موضوع المقال
2 Responses
  1. شكراً يا استاذ حشمت على الشرف اللى وهبته لمدونتى بانك تنقل موضوعك فيها وبجد انا متشكرة على تعليقك الجميل عن مدونتى اللى متجيش حاجة جمب روعه مدونتك وروعه مواضيعها الجميلة
    وكلمة هاقولهالك رد على اللى دخل فالشات وكتب كلامه ده واكيد انت عارفة
    الشجرة المثمرة يقذفها الناس بالحجارة

    فخليك ديما مثمر ومتخليش حد يحبط منك وانا لو بطلت كتابه يبقا مفيش نفس فيا اساسا لان الكتابه هيا نفسنا تفكيرنا اثرنا فالدنيا
    بتمنالك دوام التوفيق ومن تقدم لتقدم اخر ان شاء الله
    والسلام عليكم ورحمة الله وبركاتة


  2. انا متشكر جدا على كلامك الجميل ده
    اللى مش عارف ارد عليه ازاى

    مش عارف اقولك غير جزاك الله كل خير


Related Posts with Thumbnails