اللهم ولى على مصر من يصلح حالها يارب العالمين
صاحب رأى

الموضوع اللى كنت عايز اتكلم فيه من فتره

هو مهم جدا من وجهة نظرى

حصلت ضجة كبيره اوى عن الموضوع دا



والضجة دى كلها فى اتجاة واحد

بس انا شايف الحوار كله من اتجاة تانى خالص



عشان كدا قولت استنى شويه وابقى اتكلم عنه

عشان كان ممكن اللى يقرأ يفكر انه نفس الرأى فا ميكملش قراءه



معلش طولت اوى فى البداية دى



ندخل بقى فى الموضوع

كلنا فاكرين الزيارة اللى عملها السفير الاسرائيلى لجريدة الأهرام



اووووووووووووه ضجة يا معلم وفضيحة

وطبعا دى فرصة الاعلام المصرى ، اعلام الفضايح



كله مسك الموضوع بقى وقعد يفتى على قد ما قدر

اللى يتهم ناس بالعماله والجاسوسيه

واللى يقول دنسوا الجريدة

دا طبعا عشان عم عبده لسه ماسح وكانس :)

واللى يقول اكيد فى مخطط لحاجه

واللى يقول دخل الجريده هيلعبوا فى ثقافتنا

حوش الثقافه يا واد



كل الناس مشيت فى اتجاه واحد وهو الاتهام الموجه لمستضيف السفير فى الجريدة

الاستاذه \ هاله مصطفى



نفسى افهم بس

وواحد يفكر معايا كدا



لو دخلت بيت ولقيت واحده او واحد بيرقص ولى امرهما ماسك مصحف بيقرأ قرآن

هتقولى ايه الهبل دا

خليك بس معايا للآخر



بذمتك ما هتستغرب من تصرف اللى بيرقص

مش الموقف دا تقدر تمسك اللى بيرقص دا تموته من الضرب



لكن لو دخلت بيت ولقيت بنت او ولد بيرقص وولى امره ماسك الطبله وبيطبل له

والله ما هتنطق خالص ولا هتستغرب

لان دا امر طبيعى

عشان كدا المثل بيقول ايه

"اذا كان رب البيت بالدف ضارب فشيمه اهل البيت الرقص"



نوصل بقى للمراد من دا كله

ازاى ابقى زعلان ومتضايق من زياره السفير للجريده

وهو فى الاصل مقيم فى القاهره بامر من ولى امرنا

يعنى ولى الامر طبل اهو فى الاول



بذمتكم مش دا المنطق

ولا احنا بس نحب نقول ليه وازاى ونوجه اتهامات وخلاص



وكمان الدستور بتاعنا مش بينص على منع اى اسرائيلى من دخول اى مؤسسه حكومية



مين سمح لاى اسرائيلى انه يدخل مصر ويخرج زى ماهو عايز

يا جدعان بصوا للموضوع من زاوية صح

بصوا له من اساسه



بلاش نمسك الفروع ونستقوى عليها ونحاول نكسرها

لانك لو عايز الصح اقطع الجذر



اذا اردت ان تتخلص من الثعبان فاقطع رأسه

مش ديله ولا حته منه



اكيد الناس فاهمه قصدى كويس اوى



انا عارف ان فى ناس كتير بتدخل المدونه مره وبعد كدا لا

من المواضيع اللى بكتبها

مظم الناس بدأت تكره انها تتكلم عن حاجه فى مصلحه البلد

كل الناس عايزه تتكلم عن الحب والاغانى والاشعار وبس

والله دا تفكيرى بقى

وانا بكتب لنفسى قبل ما بكتب لحد تانى

مجرد افكار بحاول ادونها



المهم بعد كدا بفتره

قررت الجريدة بعد الهجوم الغاشم

قرار مهم

منع اى اسرائيلى من دخول المؤسسه

ههههههههههه

والله هموت من الضحك



يعنى المؤسسه دى اهم من مصر

وهى اهم جزء فى مصر



امنعهم ازاى من دخول مؤسسه وهم فى الاساس مش ممنوعين من دخول بلدى



مش ولى امرنا بردو هو اللى سمح بكدا

حد مننا بيقدر يسافر اسرائيل فى اى وقت زى ما هما بيعملوا معانا

والله ما بيحصل



احنا ضعاف جدا

وتفكيرنا محدود اوى

اوى

اوى

اوى



السلام ختام يا شعب
موضوع المقال
4 Responses
  1. OlivE Says:

    موضوع حضرتك متميز

    بس ليه بتبصوا لواحد زار جريده لمجرد انه شرب فنجان قهوه ومشى منها
    هتقولوا بيدخل فى شئونها وهيحاولوا معرفش يعملوا فيها ايه

    اومال بقى المدن اللى فعلا موجوده فى مصر ويمكن مسموح لليهود والاجانب دخولها اسهل مننا
    منهم طابا وشرم
    تعالا كدا وشوف اى اتوبيس رايح شرم ولمحه فيه واحده منتقبه او واحد ملتحى
    وانت منين ورايح فين ووو وكمان ممكن ينزلوه من الاتوبيس ويفتحوا معاه تحقيق ال ايه خايفين عليهم مننا
    دى بلدنا احنا مش بلدهم
    هما قادرين يتمتعوا بيها عننا
    هما واخدين حريتهم وليهم حمايه عننا احنا صحابها


    سورى يمكن كلامى يكون بعيد عن موضوع حضرتك
    بس كلها سياسيه بلد بتخاف من اللى يقولها بخ ومتخفش على ولادها لو غرقوا ولا اتولع فيهم بجاز ولا ولا ولا ولا


    حاجات كتير اوى
    مش العيب فى الحكومه وبس
    دى كل حاجة بايظه بصراحه



    سلامى


  2. شوف هو انا مختلفه معاك..
    بمعنى فى فرق بين التطبيع السياسى والتطبيع الشعبى صح ولا لأ؟
    يعنى ان الدوله سياستها تكون كده دى معاهدات واتفاقيات فرضت عليها لكن ان الموضوع يباه على جميع الاصعده مينفعش والدليل ان كلنا لازلنا نعتبرهم اعداء بالرغم من الاتفاقيات لكن متقدرش تجبر رجال سياسه تحكمهم قوانين دوليه وعلاقات دول واتفاقات على ده .

    طب هقولك مثال فاكر لما طنطاوى سلم على بيريز والدنيا اتقلبت مع ان فى تطبيع زى مبتقول لكن فى فرق ان طنطاوى مش رجل سياسه ولا فى حاجه تجبره على كده...


  3. عاشـــــــــقة القمر said...
    \\موضوع حضرتك متمي
    من بعض ما عندكم

    \\بس ليه بتبصوا لواحد زار جريده لمجرد انه شرب فنجان قهوه ومشى منها
    هتقولوا بيدخل فى شئونها وهيحاولوا معرفش يعملوا فيها ايه\\

    والله دا اللى حصل وقالوا كتير اوى

    \\اومال بقى المدن اللى فعلا موجوده فى مصر ويمكن مسموح لليهود والاجانب دخولها اسهل مننا\\

    حسبى الله ونعم الوكيل

    \\يفتحوا معاه تحقيق ال ايه خايفين عليهم مننا\\

    طبعا لازم يخافوا
    ماهو اللى اختشوا ماتوا

    \\سورى يمكن كلامى يكون بعيد عن موضوع حضرتك\\

    لا ولا يهمك
    دا جزء كبير من الموضوع
    وهو دا اللى قصدته

    \\بس كلها سياسيه بلد بتخاف من اللى يقولها بخ ومتخفش على ولادها لو غرقوا ولا اتولع فيهم بجاز ولا ولا ولا ول\\

    الله الله
    جبتى خلاصة الحوار دا كله

    \\مش العيب فى الحكومه وبس
    دى كل حاجة بايظه بصراحه\\

    انا معاكى اننا محتاجين نتصلح احنا كمان
    بس لازم الكبير يتصلح عشان اللى اصغر منه يشوفه ويتعلم منه

    متشكر جدا على ردك
    ويارب دايما المواضيع تعجبك


  4. الشعب لابد له من حكومه تشكمه said...

    \\شوف هو انا مختلفه معاك..

    مرحبا بيكى الاول
    وثانيا الاختلاف فى الرأى لا يفسد للود قضيه

    \\بمعنى فى فرق بين التطبيع السياسى والتطبيع الشعبى صح ولا لأ؟\\

    اكيد صح

    \\ يعنى ان الدوله سياستها تكون كده دى معاهدات واتفاقيات فرضت عليها لكن ان الموضوع يباه على جميع الاصعده مينفعش \\

    كلامك مظبوط 100% بس عندى سؤال
    لو مكنش فى تطبيع سياسى اصلا كان هيبقى فى محاوله للتطبيع الشعبى ؟

    يارب تكونى واخده بالك من النقطة دى

    \\ان كلنا لازلنا نعتبرهم اعداء بالرغم من الاتفاقيات لكن متقدرش تجبر رجال سياسه تحكمهم قوانين دوليه وعلاقات دول واتفاقات على ده .\\

    فى مقولة زمان ايام العصر الرومانى بتقول ايه
    "الحرب لا يمكن ابدا انهائها لكن يمكن تجنبها لبعض الوقت وهذا فى مصلحة عدوك"

    المقولة دى عايزه موضوع بحاله
    لان فعلا احنا عطينا لهم فرصه يبقى اقوى واقوى واحنا زى ماحنا محلك سر

    كل اللى قصدته من الموضوع كلامك بيأكده
    ان لازم بداية التطبيع دى كلها تنتهى وهيجى يوم وتنتهى
    لان الحرب ما بينا وبينهم لا يمكن تنتهى هى اتأجلت بس

    \\طب هقولك مثال فاكر لما طنطاوى سلم على بيريز والدنيا اتقلبت مع ان فى تطبيع زى مبتقول لكن فى فرق ان طنطاوى مش رجل سياسه ولا فى حاجه تجبره على كده\\

    وانا لا زلت مصمم
    لا انا ولا انتى ولا اى حد كان يقدر يفكر يوافق على التطبيع معاهم لو كان ولى امرنا منع دا من الاساس

    بمعنى لو مفيش تطبيع سياسى لا يمكن تلاقى تطبيع شعبى
    لكن بدل فى تطبيع سياسى واحده واحده هنشوف التطبيع الشعبى


    وطبعا منوره بردك
    واختلافك شىء جميل واحترمه


Related Posts with Thumbnails