اللهم ولى على مصر من يصلح حالها يارب العالمين
صاحب رأى
كل شويه احب اكتب فى المدونة وادخل عليها واحاول اكتب

بس شوية واقول وايه الفايدة من كدا

هيبقى مجرد كلام من ضمن كل الكلام

ايه الجديد ؟

ناس يقولوا بيخرجوا غضبهم او فرحتهم فى المدونة

وناس بتاخد المدونة نظام تسلية وتضييع وقت

وناس بتقول لازم تنافق المدونين عشان حد ينافقك

ويدخل على مدونتك

طب وفين الفايدة من كل دا

فين الرسالة يا ناس

فين الايجابية

فين المشاركة بالرأى

بلاش النفاق وبلاش الهبل والتضليل

بلاش الكلام الفارغ

اتمنى ان كل مدونة يصبح لها رسالة

بتحب تقدمها لزوارها

واتمنى ان كل واحد يقول رأيه فى كل مدونة وفى صاحبها بصراحة

ليه المجاملات

عشان يدخل مدونتك

ياعم سيبها لله

لو رسالتك وصلت لشخص واحد وشاركك فيها دا كفاية جدا

بس اهم حاجه الصدق فى المشاركة

مش تحقيق غرض معين وبس


كل الناس بتنتظر اى موقف او حدث جديد بفارغ الصبر

سواء فرح او حزن مش بتفرق كتير

المهم انها حاجه تلهينا عن متاعب الحياة وهمومها

حتى اعلامنا العظيم مش بيرحمنا

بيولع فى الدنيا وبس


كان ومازال برنامج اسمه

"واحد من الناس"

النوع دا من البرامج انا موافق انه بيدور على راحة الناس

اللى بيعرض مشاكلهم

بس دا فى الظاهر بس

انما الحقيقة انه بيتاجر بأحوال الناس

المفروض الناس تفهم الفرق كويس

مابين

مساعدة الناس وبين الاتجار باحوالهم

فلو فرضنا انه عايز يساعد الناس دى

الاولى انه يتبرع بجزء من اللى بيكسبه البرنامج

عن طريق الاعلانات

ملايين تدخل للقناة وللبرنامج من احوال الناس

انها تجارة

وهو دا الفرق بين البرنامج المتاجر بأحوال الناس

وبين برنامج زى برامج طارق علام زمان

لما كان كل حلقة يساعد

" واحد من الناس"

من دخل القناة والبرنامج من اعلانات


طبعا كل واحد وله رأيه

هل تملك رأى آخر ؟
موضوع المقال
2 Responses
  1. اممممممممممممم الموضوع ده كان محور خناقه فى لقاء المدونين اللى كان فى المنصوره:)

    فى حد قال ان المدونه لازم يكون ليها هدف ورساله ,,
    وناس اعترضت وقالت حتى لو المدونه هدفها انها تكون فضفضه فين المشكله
    ...

    شوف هقولك رأى لو المدونه حتى هدفها انها تهرج فين المشكله؟؟؟
    انت بتطالب بالحريه وان محدش يفرض عليك حاجه,
    انت ليه عاوز تفرض على الناس حاجه..

    لو حد حاسس انه مخنوق وعاوز يفضفض متفهش اوى من ده دى لوحدها برضه فايده كبيره..

    حاجه كمان المدونه دى بتاعة دماغ صاحبها ,

    مش بيكتب علشان يرضى حد ,بيكتب اللى جواه..

    هتكلم عن نفسى انا مثلا بحس انى عاوزه اتكلم فى امور سياسيه لما بتستفزنى,
    واوقات بتكلم فى حجات اجتماعيه واوقات بنتقد تصرفات الشعب المصرى واوقات بنزل بوست عاوزه اضحك واهرج مع الناس,
    دى انا ودى شخصيتى ومش هغيرها علشان ارضى اى حد..
    انت بتابعنى لانك بتحب دماغى زى ماهى,بعقلها بجنونها..

    لو مش عجبك مدونه متدخلهاش لكن متفرضش على الناس حاجه..

    انت فاهم قصدى؟؟؟؟

    مش كل الناس اهتمامتها سياسه,ومش كل الناس اهتمامتها رياضه,,وهكذا..

    انت لو شفت المدونات بره هتلاقيها عباره عن تأريخ لحياة الشخص زى يومياته كده وكل واحد حر فيها...

    مينفعش تفرض على الناس حاجه ,,
    انت مدونتك اعمل فيها اللى انت عاوزه..

    *متفقه معاك فى موضوع المجاملات ده,,بس برضه اعمل اللى انت مقتنع بيه,متردش غير على الحاجه اللى بتعجبك وبسسسسسسسسس..

    وبعدين انت كمان عاوز تحرمنا من الكلام:) يعنى لا هيباه افعال ولا كلام,خلى الشعب يتكلم,كمان هنحط كمامه على بقه ونمنعه يتكلم:))

    تحياتى ليك.ومش عاجبنى الاحباط اللى نزل عليك فجاه ده:(


  2. \\ الشعب لابد له من حكومه تشكمه
    بصراحه كلامك صح صح اوى
    انا والله مش بفرض على حد شىء معين يكتبه
    او مجال معين يتكلم فيه
    ولا بحاول اغير طريقة حد فى كتابته
    انا كل اللى اتكلمت فيه الهدف من الكتابه
    حتى لو كتب حاجة زى ام رجل مسلوخه
    وضحكنا وهرجنا وكل حاجه بس استفدنا منها
    او لو انتى حكيتى عن حاجه بتضايقك او بتفضفضى فانتى كدا استفدتى وكدا يبقى المنفعه خاصه

    يبقى فى حاجه اسمها منفعه عامه ، وفى حاجه اسمها منفعه خاصه ، وفى نوع ثالث لا بيفيد نفسه ولا بيفيد غيره

    واتكلموا براحتكوا هو فى حد هيعبرنا حتى لو هوهونا حتى :)

    احترم رأيك اوى وموافقك عليه ومقدرش اغلطك
    ومعلش بقى البطالة بتجيب الاحباط خصوصا لما بسمع من الحكومه انها موفرة الشغل للشباب
    :(


Related Posts with Thumbnails