اللهم ولى على مصر من يصلح حالها يارب العالمين
صاحب رأى
الله يرحمك يا رجولة

زمان وآه من زمان
لما اسمع من ناس كبيرة عن أيام زمان 
أقول الله يرحمك يا رجولة


لما كان الشاويش يقول (هااااااا مين هناك)
ويرعب أى حد ماشى فى المنطقة 
أقول الله يرحمك يا رجولة
عشان دلوقتى الناس بتخاف من بعضيها
بتخاف لما تشوف حد ماشى جنيبها
انتهى الأمان والكل بقى جبان
يبقى الله يرحمك يا رجولة


لما حرامى يدخل على بيت 
وراجل البيت يخبى العيال ويقعد فى اوضته ميتحركش
لغايه ما الحرامى يخلص ويمشى
بحجة انه خايف على العيال وعلى نفسه لا الحرامى يأذيه
أقول الله يرحمك يا رجولة
من بعد ما الحرامى كان بيخاف
دلوقتى المسروق هو اللى بيخاف
يبقى الله يرحمك يا رجولة


لما اسمع عن ايام زمان
وازاى محدش كان يقدر يعاكس بنت فى الشارع
لان كل اللى ماشى فى الشارع رجالة
أقول الله يرحمك يا رجولة
لما تبص دلوقتى تلاقى الكل 
بيبص على المعاكسة ويضحك او يمشى فى حاله
واوقات البنت هى اللى بتعاكس الولد
يبقى الله يرحمك يا رجولة


لما السادات الله يرحمه 
زود تعريفه على رغيف العيش
والبلد قامت بمظاهرات و وولعوا الدنيا
لغاية ما السادات رجع فى كلامه
أقول الله يرحمك يا رجولة
لما نلاقى العيش بصعوبة واغلى كتير
لما ندفع ضريبة عن البيوت وساكتين
لما ناخد على قفانا بقالنا سنين
يبقى الله يرحمك يا رجولة


لما زمان هزمنا الاعداء
وعبرنا سينا ورجعنا كرامتنا
أقول الله يرحمك يا رجولة
لما كرامتى دلوقتى تضيع
وملناش حق فى سينا كمان
يبقى الله يرحمك يا رجولة


لما زمان كان الارتباط عباره عن كلمة رجالة
واستحالة تلاقى مشاكل هنا او هناك
أقول الله يرحمك يا رجولة
لما دلوقتى الارتباط عباره عن هتدفع كام
وكام بوسة على الماشى ويسيبها ويخلع
يبقى الله يرحمك يا رجولة

لما زمان كان للراجل هيبة فى بيته
ومراته سهرانه لغاية ما يرجع بيته
ويتعشوا وينام فى سلام
أقول الله يرحمك يا رجولة
لما دلوقتى الراجل ياخد فوق دماغه 
من بيته وشغله وكمان بينام جعان
يبقى الله يرحمك يا رجولة



آه وآه من زمان
حد يعرف ليه وصلنا لكده

انا كتبت الكلام دا كله بسبب حاجتين
اولا
موضوع ان حرامى يدخل بيتى
واخاف انى اطلع امسكه اقتله ودا من حقى
يا راجل "من مات دون ماله فهو شهيد"

تانى حاجه
لما بنت تبقى ماشيه فى الشارع
وبغض النظر عن هى لابسه ايه او مش لابسه اساسا
ليه مفيش عندنا رجولة اننا نقول لا لحد بيعاكس واحدة
يا راجل "من رأى منكم منكرا فليغيره "

الرجولة مش زى ما قال احمد ماهر بس 
"الراجل مش بس بكلمته الراجل برعايته لبيته واسرته"
لا الموضوع اكبر بكتير
لازم يكون في نخوة
وشهامة و احترام 
لازم يكون فيه شجاعة
لازم يكون في أمانة وصدق

الراجل مش بس بعلاقته الزوجية
ولا بتحمل المسئولية بس



حد يقولى بقى الراجل بايه ؟
اكيد كل واحد شايف تعريف الرجولة بشكل!
قولى على وصف الرجولة فى نظرك ؟

موضوع المقال
16 Responses
  1. ستيتة Says:

    الرجل كلمة متزنة صالحة صادقة
    الرجل شعور بالمسئولية مع حنية على من هو راعي لهم
    الرجل هو من إن رأيته ذكرت الله
    صالح يستدعي في عقلك ذكر الله
    الرجل كيان كامل ومجتمع عدل

    بس لما الحكومة تخرسه
    وتحسسه ان كلمته وموقفه تمنهم عمر وسجن وبهدلة وقلة قيمة
    شوية شوية تلاقيه تخلى عن المعنى في كل مكان
    وليس في السياسة فقط

    تحياتي والله يرحمك يارجولة


  2. يااااه يامحمود,دا سؤال فظيع؟
    شوف ياسيدى الرجوله ادب مش هز اكتاف:))

    اه والله فعلا الراجل اللى بجد حد محترم,يعتمد عليه,
    حد عاقل متزن,حد حنين بس وقت الجد جد,
    الراجل مش يشخط وينطر ويزعق ويباه كده راجل ,الراجل يفهم ويحتوى ويطبطب.

    الراجل مش مايص ولا زى اخينا بتاع بيت شريف اللى بيعصبنى,
    الراجل اللى بجد مش ضعيف ادام نزواته,

    الراجل يحسسك بوجوده فى كلمته,نظرته,وجوده.مش وجوده زى عدمه.

    مش بقولك الرجوله ادب مش هز اكتاف.


  3. -_- Says:

    الله يرجعك يا رجولة


  4. بجد انت حطيت إيدك على مشاكل كبيييييييييرة جدااااااااا بكلمات بسيطة جدااااااا
    وعبرت كوكتيل مشاكل بجد رهيب
    ةكمان حطيت إيدك على السبب الرئيسى وهو بجد ضياع الرجولة بجميع معانيها المعنوية وحتى الشكليه بدأت تتشوه


  5. السلام عليكم

    الله يرحمك يارجوله

    لكن مين قتلها وفين ده هو السؤال


    ودمت بخير حال وبرجوله


  6. \\ ستيته حسب الله الحمش\\

    ياريت نشوف الرجولة زى ما وصفتيها
    بس فعلا عندك حق فى ان الضغط اللى بيتعرض له الانسان هو اللى بيكسر فينا معانى الرجولة
    وابسط شىء ان لو حد اعترض على حاجه غلط الناس كلها بتقوله خليك فى حالك مش هتغير الكون يعنى
    وابسط مثال لو حد يستغل موقف فى زنقة المواصلات ويغلى الاجره ، الراجل هو اللى هيعترض بجد لكن الناس كلها هتتريق عليه ليه مش عارف ؟
    شكرا لزيارتك وتفاعلك


  7. \\الشعب لابد له من حكومه تشكمه\\
    اهلا شيما
    هو سؤال فظيع وعارف انك ماهتصدقى :)

    اللى عجبنى اوى فى ردك
    هو ان الراجل اللى بجد مش ضعيف ادام نزواته ، معظم الناس بتفكر ان الراجل لما يحقق نزوة انه كدا راجل
    لكن والله العكس ، دا مش راجل خالص لان لو راجل هيتبع طرق حلال كتير تحقق نزواتة
    سواء كانت النزوة دى شهوة للمال او النساء او اى متعه فى الدنيا

    وكمان الراجل مش وجوده زى عدمة
    بس الجزء دا خاص بالبيت اكتر
    بمعنى انه ممكن برا البيت يكون له شخصيه ومحترم جدا
    ولكن جوا البيت الزوجه بتلغى شخصيته واوقات مش بتعمل له حساب ولا بتخافه يبقى الحل ايه ؟ يهز اكتاف ولا يخليه فى الأدب :)


  8. \\Sharm\\
    شكرا يا ريس على الزيارة وعلى الدعوة دى
    ادعى كمان جايز ربنا يرحمها ويرجعها للأمة دى تانى
    الله يرحمك يا رجولة


  9. \\أم .. بوبه\\
    اولا شكرا على متابعتك وعلى مدحك الجميل دا
    بس موصفتيش الرجولة فى نظرك ؟

    هى فعلا مشكلة كبيرة وانا متكلمتش فى الموضوع دا الا لما شفت الامثلة اللى كتبتها بعينى وسمعت بودانى
    اكيد طبعا شفت بعينى وسمعت بودانى:)

    بجد انا كنت متضايق من الراجل اللى دخل عليه حرامى وخايف يقوم يمسكه دا


  10. \\ واحد من العمال \\
    وعليكم السلام ورحمة الله وبركاته

    ياريتك تجاوبنى على السؤال دا كمان :)
    مين قتلها وفين ؟

    لو اتكلمنا عن مصر زمان
    الراجل كان موجود عشان الست كانت بتحترمه
    دى وجهه نظرى

    لكن لما ظهر قاسم امين وهدى شعراوى
    يمكن فتحوا باب مكنش ينفع يتفتح لكن ينفع يتوارب
    يعنى مش يتفتح على البحرى كدا
    يتفتح بشروط
    اولا الالتزام بمعايير الدين الاسلامى
    احترام الرجل واتباع الزوج فى كل شىء عدا معصية الله عز وجل
    ثانيا الالتزام بما أمر الله به من حيث معاملة المرأه بالحسنى .

    دمت برجولة انت كمان :)
    ولو عندك اضافه لكلامى ياريت اسمعك .


  11. OlivE Says:

    الله يرحمها

    ويحسن إليها

    اظن اللى بيموت مش بيرجع تانى :(


  12. \\OlivE \\
    طب ادعيلها جايز ترجع تانى
    منورة دايما


  13. -_- Says:

    و الله لو قعدنا ندعي 100 سنة
    ان الله لا يغير ما بقوم حتى يغيروا ما بأنفسهم


    شارم لايف
    www.sharmlifeblog.com


  14. قبل كده شفت منظر شاب لاهو بنت ولا ولد استفزني خلاني اعمل بوست ماهي الرجوله

    وكل الكلام اللي انت كاتبه ده حصل

    علشان احنا ابتعدنا عن ربنا كتير

    الولد اصبح ماعندوش قدوه رجوليه صحيحه يقتدي بها غير بعض الممثلين والمغنين اللي لاهمه بنات ولا رجاله

    مافيش تواصل بين الاب وابنه علشان يعلمه مافيش لغه حقيقيه بينهم

    اي شاب بيخاف يدافع عن بنت او ياخد اي موقف رجولي علشان خايف لا يموت ونسي ان اي حد يموت فداء الدفاع عن شرف او عرض او ارض اي في سبيل الله فهو شهيد
    اصبحت الحياة اعز عندنا من الرجوله

    الموضوع كبير جدا صدقني

    ربنا يحفظ البقيه الباقيه من الرجال ويصحصح اشباه الرجال يفقوا قبل مايقابلوا ربنا بخيبيتهم

    سلامي


  15. \\Sharm\\
    طبعا عندك حق
    لازم نغير فى نفسنا كتير
    بس ادينا بندعى
    عشان ربنا يساعدنا


  16. \\ شمس النهار\\
    فعلا سبب كل دا البعد عن ربنا
    وكمان الاعلام له دور كبير فى الموضوع دا
    وغياب دور الاب زى ما قولتى عامل مهم جدا

    انا على طول بقول ان تقليد الغرب حاجه خطرة جدا واعتقد دا من ضمن الاسباب

    نورتينى
    أكيد نورتينىى مش شمس بقى :)


Related Posts with Thumbnails