اللهم ولى على مصر من يصلح حالها يارب العالمين
صاحب رأى
شعار الحزب الوطنى فى الفترة الأخيرة كان "من أجلك انت"
عايز اعرف من أجل مين ؟
من أجل الاسرة الحاكمة وحبايبهم
ولا كنتوا تقصدوا "هنجيب أجلك انت" للشعب المصرى كله


الباشا "كميل امه يا ناس" أحمد "عو" أقصد عز 
أكيد عز هو العز هيلاقى احسن منه ازاى
بيقترح قانون السماح بتجارة الأثار داخليا
والنبى عسل شربات يا عز
هو انت عايز تتاجر فى الاثار كمان
المصيبة لا تكون بتاجر فعلا فيها
وعايز تفتح لنفسك الباب بالقانون
يخرب عقل دا حزب على عقل البرلمان كله

مش كفاية كل يوم بقانون مخالف للدستور 
دستور باطل والشعب كله عايز يغيره 
تقوم انت وحبايبك تخترعوا القوانين اللى دستوركم رافضها

انا كنت فى الاول جاى اكتب موضوع عن الطفولة 
بس بصراحة الباشا بتاع الحديد نرفزنى اوى
فا مقدرتش امسك نفسى

ندخل فى موضوع الطفولة
وانا موجود على الفيس بوك
شفت الفيديو دا
طفل مصرى صغير السن
افتكرت الجملة اللى بتقول 
"الطفل المصرى اذكى طفل فى العالم حتى 6 سنوات"
قولت وماله اشوف الفيديو دا

والله ما عايز احرقلكم الفيديو
وعايزكم تشوفوا وتسمعوا بنفسكم
منكم اللى هيضحك ومنكم اللى هيصعب عليه حالنا
الاجيال اللى جايه اصعب واصعب
بلا عقل وبلا هدف وبلا روح 
بلا وبلا وبلا
فعلا مصوا دمنا واستحلوا عرضنا
وهم اللى فى الاصل وظيفتهم يحمونا
وبقت حاميها حراميها

انا لازلت احمل وزارة الاعلام بانها المسئولة 
عن تدنى اخلاق الشعب المصرى
لازلت احمل الاعلام المصرى مسئولية كل الفساد

كل واحد عنده طفل ياريت يراعى ربنا فيه
وربنا يستر الايام الجاية
واشوفكم على خير
واستمتعوا بالفيديو

بعتذر عن عدم ظهور الفيديو
انا رفعتلكم الفيديو على سيرفرين
مجرد انك تضغط هلى اللينك وتحمل
ورفعته على اليوتيوب كمان

للتحميل
أو
أو من اليوتيوب فى الفيديو دا




وشوفوا من الفيديو دا الفرق بين الطفل المصرى
والطفل اللبنانى الذى انكر وجود اسرائيل
شوفوا الفرق فى تربية الطفلين



دمتم بخير وفى طاعة الله


موضوع المقال
9 Responses
  1. sal Says:

    كل واحد عنده طفل ياريت يراعى ربنا فيه

    تحياتى


  2. OlivE Says:

    حسبى الله ونعم الوكيل
    تقريبا معنديش غير الجمله دى


    الفيديو مش مرفوع
    ممكن ترفعه تانى

    سلامى


  3. قبل اي حاجه الفيديو مش شغال عندي اعمل ايه ؟؟؟

    موضوع احمد هز ده مضحك جدا
    هو خايف يمسكوه عايز يخاليها قانوني
    ياحلااااوه ياولااااد

    وكان راي الاخ زاهي حواس ايه
    اللي محتاس عمال يلم من العالم الاثار المسروقه وبصراحه كتر خيره الوحيد اللي عمل كده

    ونبي ضحكتني طيب ماعرفتش رايه ايه في تداول تجارة المخدرات بالمره

    اه ياني الحقوني الضغط هموت

    ماعلينا


    سلام قبل مااتشل


  4. الفيديو اشتغل

    وحسبي الله ونعم الوكيل
    في الاب والام اللي شجعوا ابنهم وشغلوا له الاغنيه لحد ماحفظها
    واكيد كانوا سعداء جدا وكل مايشوفوا حد يقولوا له غني لتانت غني لعمو
    طبعا الطفل افتكر انها حاجه حلوه

    زي الام اللي تسيب بنتها اللي عندها تلات او اربع سنين يتحط لها ميكياج في عيد ميلاد والا فرح وارقصي ياله بالمره

    هدوم الاطفال في مصر اصبحت مسخ بتدبح الطفوله
    ملبسنهم زي بنات الكليبات
    حسبي الله ونعم الوكيل

    سلام


  5. \\sal\\
    تقبل تحياتى
    وشكرا على زيارتك

    سلام


  6. \\OlivE\\
    انا رفعت الفيديو تانى
    وكمان حطيت فيديو لطفل لبنانى
    شوفى الفرق فى التربية
    واحد بيعلم ابنه عدم وجود اسرائيل والتانى بيعلمه يغنى شعبى

    سلام


  7. \\ شمس النهار \\
    منورانا يا شمس
    والله زاهى حواس وفاروق حسنى هددوا بالاستقالة فى حالة الموافقه على الاقتراح دا
    لان فى قانون بيسمح لاى حد انه يسافر بممتلكاته الخاصة وفى حالة تنفيذ القانون الاثار هتبقى ملكية خاصة للى اشترى

    كل نقطة قولتيها على تربية الاطفال نقط ضعف فينا وهتنتجلنا جيل ما يعلم بيه الا ربنا
    كنا بنقول على نفسنا جيل مختلف واقل فكريا من اللى قبلنا والاخلاق متدنية فينا
    امال الجيل اللى جاى دا هيبقى ايه
    ربنا يستر

    لك تحياتى


  8. انا مش عايزة اعلق على احمد عز بصراحة بيفكرنى بالأسطة منظر إللى كان فى مسلسل الشهد والدموع


    بس بالنسبة للأطفال إللى فى الفيديو هو فعلا الفرق بينهم يبكى

    بس مش ده حال كل أطفال مصر وده حال كل اطفال لبنان

    فى كل البلاد موجود حسن التربية وسوء التربيه

    وفى العموم لازم كل أب وأم يتقوا الله فى تربيتهم للأولادهم


  9. MaNoOoSh Says:

    مش غلطة الاعلام بس
    مهي كمان غلطة النفوس الضعيفة اللى شجعت الاعلام دة يستفحل ويتوغل جوة ابسط البيوت المصرية


    ومع ذلك في نماذج مشرفة جدا للطفل المصري الذكي اللى أهلة اتقو الله فى تربيته


Related Posts with Thumbnails