شارك ولو برأيك

صاحب رأى

" آه يا بلد ليه حبيبتك "
اللى بيحب سينما هيفتكر الجمله دى من فيلم "كاراتيه" بتاعت احمد زكى رحمه الله

طبعا استحاله نلاقى ناس لسه بتحب البلد بعد كل اللى بنشوفه ونسمعه وبنحسه وبنعيشه
اموت واعرف السبب ايه؟

ليه الحكومه دايما مغيبه
وليه احنا مش نحب نعالج مشاكلنا وهى صغيره ونستنى لما تكبر ومش تبقى قابله للحل ؟

الايام دى الحكومه بدأت تعرف وتسمع عن عمليات ومؤامرات اسرائيل فى حوض النيل
علشان يقللوا حصه مصر من مياه النيل
ههههههههههههههه
والله هاموت من الضحك على خبر زى دا
احنا من زمان عارفين الكلام دا
وبنتكلم فيه وبنقول باعلى صوتنا "فوقى يا حكومه النيل بيضيع"
ولا حياه لمن تنادى
كان المفروض نعمل شويه تعديلات
فى اتفاقيات حوض النيل
بس مين يعمل بقى

وكان فى ناس ربنا يصلح حالهم
وطبعا مش موجودين دلوقتى فى مجلس الشعب
والله اعلم راحوا فين؟
كانوا بينادوا بنفس الكلام من اكتر من 10 سنين
علشان الحكومه تتحرك وتعمل حاجه !!!
حسبى الله ونعم الوكيل
أموت واعرف السبب ايه ؟

مصيبه اكبر واشد وبتعلى الضغط عندى
"تصدير الغاز الى اسرائيل"
الشعب كله رافض الاتفاقيه ، وبردو مش عارفين نوقف تصدير الغاز
مش كده وبس
دا كمان الحكومه بتقولنا "طز"
وتعلى نسبة التصدير 50% بنفس السعر الرخيص اللى اتنيلوا واتفقوا بيه
اموت واعرف السبب ايه ؟

وزارة الصحه ويا لها من وزارة؟
"مستشار وزير الصحه" بياخد رشاوى من شركات ادويه
علشان يدخلوا البلد ادويه فاسده
طب ليه يابن "....."
هى البلد ناقصه لما احاول اعالج مرضى بدواء فاسد
اموت واعرف السبب ايه ؟

القمح الفاسد و الذره الفاسده !
احنا البلد اللى كنا بنصدر قمح بقينا بنستورده
وكمان ايه
مش قمح طبيعى كده
لا
دا قمح على اعلى مستوى
السموم اللى فيه تكاد تكون غير مصنفه
يعنى هتموت هتموت
هو ايه اللى بيحصل بالظبط؟
معنى كده اننا بسم الله ما شاء الله
معدتنا بمب وبتستحمل
اموت واعرف السبب ايه ؟

وكله كوم
ولا مؤاخذه فى اللفظ
"الحمير" اللى كانوا بيصقفوا لاوباما على كل كلمه يقولها
وكانه زعيم الامه والمهدى المنتظر
او مش بيعرفوا انجليزى اصلا
ولما بيقف فى الكلام يصقفوا
واهو مولد ونشبع فيه تصقيف
ومش واخدين بالهم ان اوباما كان بيتكلم بالطريقه دى
"احنا عاوزين نحب الاسلام ونحترمه لكن لازم تحترموا امريكا اولا"
الصراحه انا احترمت فيه انه حقق هدفه من زياره مصر
وهو الضحك علينا واللعب بعواطفنا وثبتنا بكلمتين من اجمل ما يكونوا
وكان معنى الخطاب كله انا الخصه فى جمله:
"احنا بنعمل لمصلحتنا جميعا علشان كده لما اعمل اى حاجه اوعى حد يقولى غلط"
اموت واعرف السبب ايه ؟

البلد لازم يحصل فيها نظام وتظبيط
امتى؟
لما اشوف مسئول مهم هيسافر من الطريق دا
او هيروح هنا او هناك من هنا
لازم يكون الطريق فيه ورد
ويتسفلت
استغفر الله العظيم
اموت واعرف السبب ايه؟

الاعلام ومصايبه
بنتبسط اوى وقت الفضايح
وتلاقى كله شغال ميه ميه فى البرامج
ويا سلام على التقطيع يا باشا
لكن هات لى برنامج يحاول يشجع مواهب مصريه على الابتكار ويساعدهم
او يساعد اسره فقيره
لا احنا نحب نتفرج وبس
ويا عينى على الحزن واليأس

و"هيفا وهبى" بتمثل
نو كومينت خالص
ومش هنطق
اموت واعرف السبب ايه ؟

بجد بقيت حاسس انى غريب عن بلدى
بقيت حاسس انى فى غربه فعلا
ومش عارف ارجع لبلدى ازاى
مش لاقى لها طريق
حاسس باليأس لدرجه انى بكلم نفسى اكتر ما بتنفس
علشان كده قولت اكتب البوست ده
يمكن ارتاح واعرف انام
واحس انى بحاول اعرف الطريق وبكسر اليأس
اموت واعرف السبب فين ؟

موضوع المقال المقالات السياسية 2 عدد من شاركوا برأيهم |

البكاء على اللبن المسكوب

صاحب رأى

من زمان وانا بقول الجمله دى فى اى ازمه تقابلنى
انسى اعمل حاجه مهمه ، تضيع منى فرصة .

"لا فائدة من البكاء على اللبن المسكوب"

اه بزعل على ضياع الشىء ، لكن مش بهبط بمعنوياتى للأرض
لازم تقوى من نفسك وتتعلم من خطأك وتثق فى نفسك وقدرتك .

لما نيجى نشوف بقى المنتخب المصرى وليله البارحة وما اوجعها من ليلة ؟
الناس كلها من امبارح متحطمه وبتحطم فى روح الفريق
مع انك خلاص زعلت من النتيجه والأداء السىء ، ليه تحطم فريقك بقى
ليه مش تقف وراه وتساعده انه يتعلم ويعدى من درس الجزائر .

عندك امل او عندك يأس فى الوصول مش مشكلتنا ، المهم تقف ورا بلدك وتقويها مش تضعفها .
وانسى بقى الخلافات اللى بين الانديه ،انت بتشجع المنتخب كله مش واحد آه وواحد لأ .

خلينا نشارك منتخبنا بمؤازرته فى محنته ، كما فرحنا معه فى انتصاراته .
ولا نسينا الفرحة والانتصارات والكلام الجميل عن المنتخب .

اتمنى اننا نفضل نحب منتخبنا ونشجعه ، علشان نلاقى منه روح ونتيجه نرضى بيها .
ولا تنسوا
"لا فائدة من البكاء على اللبن المسكوب"

موضوع المقال رياضة 3 عدد من شاركوا برأيهم |

مصر و الجزائر !!!

صاحب رأى

استر يارب النهارده
والله خايف اوى من مباراه اليوم
مباريات مصر والجزائر بتبقى زى الحرب بالظبط
وربنا يستر ، لان الواحد مش ناقص نكد
المنتخب هو الحاجه الوحيده اللى ممكن تفرحنا شويه النهارده
اتمنى اننا نرجع من الجزائر بالثلاث نقاط .
يارب يارب يارب

علشان نتساوى مع زامبيا
ونجدد املنا فى تحقيق حلم المونديال بقى

وبخصوص كأس القارات ، انا مش عايز غير اننا نطلع منه بهزيمه خفيفه بعد اللى عملته البرازيل يوم امس فى أوروجواى .

يارب نكسب النهارده !!!!!!

موضوع المقال رياضة 5 عدد من شاركوا برأيهم |

أنفلونزا الخنازير ستدخل مصر عاجلاً أم آجلاً..

صاحب رأى

بجد بجد بجد حاجة تجنن التصريحات بتاعت 2009
كل وزير بيطلع يقول كلام مش فاهم هو بيقول ايه؟
المهم انه يا يضحك الناس يا يضحك عليهم .
وآخرهم وزير الصحه "حاتم بيه الجبلى" بيقول ان انفلونزا الخنازير هتدخل مصر فى اى وقت .
ليه يا عم الوزير كده مش انتم المفروض بتأمنوا البلد علشان مش تدخل ولا ايه ،
ولا انتم متعينين وزراء علشان تقولونا ان الفيروس هيدخل مصر .
ما احنا عارفين من غير ما تقولوا ، ولا انت بتقولنا كده علشان لو دخل مش نقول انت السبب وانك نبهتنا اصلا .
وبعدين اللى هيجننى بجد وهو بيقول "وسنضرب لخمه فى البدايه" يعنى ايه يا عم الحاج "على رأى واحد صاحبى"
ازاى تقول كده بس

والله لو انا رئيس جمهوريه اطردك برا الوزاره فورا!!!!
هو انت قاعد فى المنصب دا علشان تضرب لنا لخمات ، لخمه هنا ولخمه هناك لغايه ما الشعب كله يموت ؟؟؟؟!!!!
طب ما تشوف البلاد اللى الاصابه فيها بيعملوا ايه علشان تقدر تعمل زيهم .
ولا احنا نحب نمشى فى الضلمه ومش نشوف قدامنا ونعلم نفسنا.

ما كفايه علينا انفلونزا الطيور وتحقيقنا اعلى نسبه فى الاصابه والوفيات .

اللى سيادتك اتكلمت عنها بالنسب مش بالارقام "وأستطيع أن أقول لدينا أحسن وزارة صحة فى الكرة الأرضية، لأنى عندى نسبة وفيات أقل من نسبة الوفيات العالمية بـ٥٠ %، النسبة العالمية ٦٦%، النسبة لدينا ٣٣%"
والارقام طبعا اعلى معدل حصل .
لا وايه بيقول ان فى احتمال كبير وان مصر مرشحه ان فيروس انفلونزا الطيور يتحول .
هههههههههههههه
هم يضحك وهم يبكى .

يا سياده الوزير كفايه كده عليك والله.
المستشفيات فى انهيار تام ، الناس بتدخل مستشفى علشان شويه برد تخرج ناقصه كليه .
وناس تدخل المستشفى تاخد كيس دم وتموت .
كفايه فساد بقى كفايه .

ولا علشان اسمك جبلى يبقى هتفضل شديد وبصحتك "الله فوق كل شىء".

وكمان سيادتك بتتكلم عن المقابر الجماعيه والموت وعدم التكفين والفتاوى ونسيت تتكلم عن خطه العلاج ، يعنى التفكير كله فى اتجاه اننا اموات وكل حاجه بايد ربنا فين شغلك يا باشا ؟؟؟؟؟؟؟

لا ولسه كمان مشكله دبح الخنازير بطريقه وحشيه

يعنى نعمل ايه بس نديها شيكولاته مسممه مثلا ولا نلاعبها شويه قبل ما ندبحها
ولا نموت احنا وخلاص

حسبى الله ونعم الوكيل
وعجبى

موضوع المقال المقالات السياسية 2 عدد من شاركوا برأيهم |

مين صح ومين غلط ؟؟؟

صاحب رأى

اكيد كلنا سمعنا عن موضوع منع المواقع الاباحيه من على الانترنت

اول كلمه تخطر على بالنا فى موضوع زى دا" اخيرا هتعملوا حاجه كويسه وتمنعونا من الانحطاط الاخلاقى ده"
بس هل معنى كده ان الحياه هتبقى جميله ولذيذه ؟؟؟؟؟؟
هل التحرش هيقل ولا هيزيد ؟ ، مش معنى كلامى انى ضد قضيه منع المواقع الاباحية
انا معاها 100% ، بس المفروض انى لما امشى فى طريق اكمله كلو مش اخد جزء واسيب الباقى واقول انا وصلت .
وليه سايبين الاعلام يلعب ويكبر فى موضوع التحرش دا

ويجيب بنات الواحد بيشوفهم فى الصور بس بيبقى نفسه انه يتحرش بيهم "من حيث اللبس اللى مغطى ومش مغطى"
مش عارف ازاى وصلنا لمرحله زى دى .
انا كشاب مصرى بحط نفسى مكان واحد بقاله اكتر من 30 سنه مش بياكل "مش متجوز" وحطينا قدامه سندويتش "واحده من بتوع التحرش"
هيعمل ايه يعنى؟؟؟؟؟؟
ولو فرضنا ان السندويتش كان مقفول عليه بقفل اسمه الاخلاق "بنت محترمه محجبه"
هيعمل ايه فى الموقف دا ؟؟؟؟
اكيد كلنا عارفين ان البنت لو محترمه 90% مش هيحصل اى حاجه والله .
من كام يوم ظهرت لنا بنات التحرش فى اكتر من برنامج وبدأوا يتكلموا ازاى هما بيعانوا من الموضوع دا ، اكتر كلمه كانت بتضايقنى انها تقول مش بحط ميكياج وساتره نفسها وبيجوا يتحرشوا بيها ، طب دا كلام ناس عاقلين !!!!!!!!!!!
امنعوا اللبس الضيق للبنات ، وفروا فرص عمل للشباب ، ابنوا مساكن جديده ، اعملوا زى السعوديه شوفوا بيمنعوا النساء من موضوع اللبس دا ازاى ؟؟
حرام عليكم احنا تعبنا ..

امنعوا المواقع لانها فعلا سبب فى انحطاطنا دا بس ياريت نحاول نمنع سبب ومصيبه اكبر لان مصادر الانحطاط هتتجه كلها للتحرش يا حكومه .

وربنا يستر و عجبى .....

موضوع المقال تخاريف 2 عدد من شاركوا برأيهم |