اللهم ولى على مصر من يصلح حالها يارب العالمين
صاحب رأى
السلام عليكم ورحمة الله


بجد وحشتنى جدا المدونة
والناس وحشتنى اوى

وادخل فى الموضوع على طول


والموضوع اللى هتكلم فيه


هو عن سبب بعدى عن التدوين الفتره دى كلها




اصعب مرحلة ممكن يمر بيها الانسان
مرحلة التغيير والمسئولية



حاجة مش سهلة انك تغير عاداتك وروتينك اليومى

حاجة صعبه جدا ولا انت ايه رأيك انت

فكر كدا معايا

فاكر ايام الابتدائية ولما خلصتها وروحت للاعدادى

فاكر مرحلة التغيير دى

وان عقلك بدأ يكبر شويه شويه
وحاجات تانيه بتتغير
فاكر بقى مرحلة الاعدادى وبعدها تدخل الثانوية او المعهد او اى مرحلة تانيه
تغيير رهيب فى كل حاجه

والمسئوليه بتكبر واحده واحده

ويا سلام بقى لما خلصنا الثانوى ودخلنا الكلية او المعهد او الاكاديمية

وعيشنا الحياة الجامعية


كل دا يا ريس كوووووووم

وبعد ما تتخرج كوووووووووم تانى


مسئوووووولية رهيبة ومخيفة

حاجات كتيرة اتغيرت

روتينك اليومى اتلخبط

كل يوم بتواجه مشكلة ولازم تواجه كل شىء

مفيش مفر ولا فى مكان للهرب


وطبعا كالعاده ماما الحكومة

بتناااااااااااااام وتنساك اول ما تاخد شهادة التخرج

عشان كدا اى شاب مصرى عنده مسئولية

بيفكر على طووول فى السفر ، زيى كدا


هتقولوا فى ناس بتقعد وبتعيش من غير سفر

اقولك صح

بس مش عنده نفس المسئولية

:)

بيبقى مرتاح شويه

يعنى مثلا شغله بيبقى قريب من بيته

مش زي حالتنا من الاقاليم وشغلنا فى القاهرة

والمرتب تصرفه على نفسك قبل البيت

يبقى مفيش حل غير السفر

ادعولى يا جماعة الواحد يسافر حتى لو بعربيه كارو :)

يوم الجمعة اللى فاتت زعلت اوى انى مكنتش بدخل المدونة

لان كان فى لقاء للمدونين فى المنصورة بلدى حبيبتى


وبما انى مدون صغنون على ادى

كنت عايز احضر معاهم اليوم دا

خصوصا ان كان فى تبرع بالدم

وبما ان دمى تقيل فا كنت عايز اخففه شويه :)



وطبعا مش ناسى موضوع القطار بتاع العياط

بس مش عايز اتكلم فيه

لان دى هتبقى كلاكيت تالت مرة وبصراحة زهقت

فا شوفوا الفيديو دا وخلاص


اه يا عم مش ناسى والله

اللى بيفكرنى بموضوع ماتش مصر والجزائر

عايزنى اقول ايه يعنى


اكيد هقول



مصر مصر مصر

وعجبى

mo7eba lellah

سيداتى انساتى

ولو الرجالة عاوزين يسمعوا مفيش مانع

اهو تستفيدوا برضه

اهلا بيكم فى طبق اليوم

معاكم محبة لله ونبدء الحلقة

طبق اليوم عبارة عن نوبل


المقادير

كلام معسول باى كمية انت تحبها

يعنى على قد ما كترت فى الكلام

كل ما كان اطعم

امانى ودى بقى حريه يعنى اطلب واتمنى وقول زى

ما انت عاوز

وعووووووووود بس افتكر ان وعد الحر دين عليه

بس الايام دى اشك ان فى احرار


طريقة التحضير

نحط المقادير فوق بعض ونخلط ونفرم ونطنش

المنظر اللى هنشوفه لانه مقرف

بس سيبك فى الاخر طعمه رائع

هينسيك اللى بتشوفه

اقولك بقى تاثير المقادير

اولا الكلام المعسول بينسي ضيوفك اساميهم

وهمومهم وديونهم

بينسيهم اللى بيشوفوه من مذابح ومجازر فى

التليفزيون وهما بياكلوا

بينسيهم ان زمان اتقال اننا احرار ودمنا حر

ما علينا

خلى البرنامج يخلص على خير


ثانيا الامانى بقى بتديهم امل فى غد مشرق

وابقوا قابلونى

هى الشماعة اللى بنشيل عن دماغنا

بيها الهم

نقول بكرة هنعمل وبكرة هيبقى ومفيش بكرة اصلا
بيبان


ثالثا الوعود يا سلام عليه بيدي طعم غريب

تدوقه تنام ومش اى نوم نوم تصحى منه على حتة

قلم ياااااااااااااااه

تحس انك شارب او سوري ضارب حاجة اصفرا

ياللا ما علينا


معلومة بس انكم لو عملتوا الاكلة دى مظبوط

فى خلال 9 شهور هتاخدوا وسام نوبل


يارب تكونوا استمتعتم ببرنامجى

وبالهنا والشفا
mo7eba lellah


شفتى ياخالتى اللى جرا؟؟؟؟؟؟؟


من ستة وتلاتين سنة رجعلنا اللى ناقصنا


بدم وعرق ناس شافوا كتير علشان عيونها


شفتى الحب؟؟؟


شفتى لغاية فين مستعدين نفديها؟؟؟


شفت لفين ولا تمر فيها؟؟؟؟


شفتى اللى حصل؟ مقولتلكيش؟ اخص عليا اخص بجد


يرضيكى ياخلتى ان توتو وسوسو اللى بيلبسوا اخر فاشون يتسقفلهم؟؟


يرضيكى المحترمة اللى لابسة طرحتها ومبتعملش حاجة تنطرد وتتهزق؟؟


يرضيكى؟؟ يرضيكى؟؟


ساكتة ليه يا خالتى؟؟ ساكتة ليه؟؟


ساكتة زى ما كله ساكت؟؟


ساكتة لان محدش سامعنا غيرنا؟؟


احنا هنفضل نسمعنا ونسمعنا لغاية منطفش مننا؟؟


صحيح الكلام هيفيد بايه؟؟


اللى عاش تحت التراب سنين فدا للتراب ضيعنا حقه


ضيعنا رايته


اللى يقول وانا مالى طب وانا مالى؟؟


انا مالى انى اتخلقت حرة؟؟


انا مالى لو اتخلقت بصوت عالى؟؟


انا مالى لو تعبت من كتر السمع قلت اغلط واتكلم؟؟


انا مالى؟؟


عارفة يا خالتى انا ابقى ايه؟؟


انا مخلوق ضعيف فيا ارادة قوية عاوزنى اسيبها وامشي جنب الحيط


دا لو لقيت الحيط اصلا


ماهو يا خالتى فى ناس كدة اه


يبقى نفسها تقفل اديها عالناس وتعصرهم


فى ناس .......................


اقول ايه ولا ايه مانتى اكيد عارفة


بس الى متعرفيهوش يا خالتى انى مش هاسكت


حتى لو فضلت اصرخ ومحدش يسمعنى غيري


ما انا له حق عليا


له حق احميه له حق ملعبش بيه


انا مش جاية ادايقك والله يا خالتى بس دى قسمتك وقسمتى


انى اعيش على ترابها ونفسي احميه لكن بنلاقيهم بجزمهم على دماغنا


قالوا زمان الله اكبر وعبروا القناة


قالوا زمان نفديك بالدم راح اتلوث


والله يا خالتى


خالتى خالتى خالتى


اه نسيت انى خالتى ماتت بتلوث الدم


حسبي الله ونعم الوكيل



صاحب رأى
كالعادة وزى كل يوم

قولت اشوف الاخبار ايه واتنكد شويه


بس المره دى وعلى غير العادة

مش عارف حصل لى ايه

حاله كدا ما بين الزعل والفرح

مبقتش عارف انا حاسس بايه


شويه احس بالضيق وفى نفس الوقت بضحك

سبحان الله


المهم نقول بقى اللى حصل دا ليه


دخلت على موقع مصراوى لقيت خبر بعنوان

"شيخ الأزهر يجبر طالبة على خلع النقاب بعد نقاش حاد"


كالعادة قولت يارب يكون خير


ودخلت اشوف الموضوع


قمة الأدب من طالبة فى الصف الثانى الاعدادى الازهرى

ترتدى النقاب

والطبيعى ان هذا لا حرج فيه

دى فى معهد ازهرى يعنى عادى جدا تلبس نقاب


وفى المقابل حدث ولا حرج

شيخ الازهر الدكتور محمد سيد طنطاوى


يعترض على لبسها للنقاب

قال ايه لسه صغيره

وعمل مشكله واجبرها تخلع النقاب


والبنت يا عينى تقوله انا مش عايزه حد يشوف وشى


وشيخ الازهر يقول النقاب عاده

النقاب عاده هههههههههههههه

ويقولها انا اعرف اكتر منك ومن اللى خلفوكى

الله على ادبك وعطفك يا شيخنا


وبعد كلام كتير وهبل من شيخ جليل

قرر انه ينزل قرار بمنع ارتداء النقاب فى المعاهد الازهريه



وانا من هذه المدونه احب انصح شيخنا الجليل

ان يجعل ارتداء النقاب خاص بالملاهى الليليه فقط

ماهو فى اماكن الدين ممنوع بقى


ربنا يهدى علماءنا


فى حاجت كدا مينفعش فيها فصال ولا كلام

ماهو وافق قبل كدا على اللى عملته فرنسا ومنع ارتداء الحجاب

والله خساره فيك الدعوه

ربنا ينتقم منك يا جدع

ربنا ينتقم منك


حسبى الله ونعم الوكيل


اللى عايز يتلخبط فى مشاعره يقرا الخبر هنا

صاحب رأى

الموضوع اللى كنت عايز اتكلم فيه من فتره

هو مهم جدا من وجهة نظرى

حصلت ضجة كبيره اوى عن الموضوع دا



والضجة دى كلها فى اتجاة واحد

بس انا شايف الحوار كله من اتجاة تانى خالص



عشان كدا قولت استنى شويه وابقى اتكلم عنه

عشان كان ممكن اللى يقرأ يفكر انه نفس الرأى فا ميكملش قراءه



معلش طولت اوى فى البداية دى



ندخل بقى فى الموضوع

كلنا فاكرين الزيارة اللى عملها السفير الاسرائيلى لجريدة الأهرام



اووووووووووووه ضجة يا معلم وفضيحة

وطبعا دى فرصة الاعلام المصرى ، اعلام الفضايح



كله مسك الموضوع بقى وقعد يفتى على قد ما قدر

اللى يتهم ناس بالعماله والجاسوسيه

واللى يقول دنسوا الجريدة

دا طبعا عشان عم عبده لسه ماسح وكانس :)

واللى يقول اكيد فى مخطط لحاجه

واللى يقول دخل الجريده هيلعبوا فى ثقافتنا

حوش الثقافه يا واد



كل الناس مشيت فى اتجاه واحد وهو الاتهام الموجه لمستضيف السفير فى الجريدة

الاستاذه \ هاله مصطفى



نفسى افهم بس

وواحد يفكر معايا كدا



لو دخلت بيت ولقيت واحده او واحد بيرقص ولى امرهما ماسك مصحف بيقرأ قرآن

هتقولى ايه الهبل دا

خليك بس معايا للآخر



بذمتك ما هتستغرب من تصرف اللى بيرقص

مش الموقف دا تقدر تمسك اللى بيرقص دا تموته من الضرب



لكن لو دخلت بيت ولقيت بنت او ولد بيرقص وولى امره ماسك الطبله وبيطبل له

والله ما هتنطق خالص ولا هتستغرب

لان دا امر طبيعى

عشان كدا المثل بيقول ايه

"اذا كان رب البيت بالدف ضارب فشيمه اهل البيت الرقص"



نوصل بقى للمراد من دا كله

ازاى ابقى زعلان ومتضايق من زياره السفير للجريده

وهو فى الاصل مقيم فى القاهره بامر من ولى امرنا

يعنى ولى الامر طبل اهو فى الاول



بذمتكم مش دا المنطق

ولا احنا بس نحب نقول ليه وازاى ونوجه اتهامات وخلاص



وكمان الدستور بتاعنا مش بينص على منع اى اسرائيلى من دخول اى مؤسسه حكومية



مين سمح لاى اسرائيلى انه يدخل مصر ويخرج زى ماهو عايز

يا جدعان بصوا للموضوع من زاوية صح

بصوا له من اساسه



بلاش نمسك الفروع ونستقوى عليها ونحاول نكسرها

لانك لو عايز الصح اقطع الجذر



اذا اردت ان تتخلص من الثعبان فاقطع رأسه

مش ديله ولا حته منه



اكيد الناس فاهمه قصدى كويس اوى



انا عارف ان فى ناس كتير بتدخل المدونه مره وبعد كدا لا

من المواضيع اللى بكتبها

مظم الناس بدأت تكره انها تتكلم عن حاجه فى مصلحه البلد

كل الناس عايزه تتكلم عن الحب والاغانى والاشعار وبس

والله دا تفكيرى بقى

وانا بكتب لنفسى قبل ما بكتب لحد تانى

مجرد افكار بحاول ادونها



المهم بعد كدا بفتره

قررت الجريدة بعد الهجوم الغاشم

قرار مهم

منع اى اسرائيلى من دخول المؤسسه

ههههههههههه

والله هموت من الضحك



يعنى المؤسسه دى اهم من مصر

وهى اهم جزء فى مصر



امنعهم ازاى من دخول مؤسسه وهم فى الاساس مش ممنوعين من دخول بلدى



مش ولى امرنا بردو هو اللى سمح بكدا

حد مننا بيقدر يسافر اسرائيل فى اى وقت زى ما هما بيعملوا معانا

والله ما بيحصل



احنا ضعاف جدا

وتفكيرنا محدود اوى

اوى

اوى

اوى



السلام ختام يا شعب
Related Posts with Thumbnails