اللهم ولى على مصر من يصلح حالها يارب العالمين
صاحب رأى

مش عارف ابدأ منين
ومش عارف ابدأ ازاى
انا هاتكلم وارغى 
من غير ترتيب

انا انسان بسيط جدا
ابسط من البسط ومتواضع فى المقام 
معلش بحب الرياضيات شوية

انا بعدت عن بيتى واهلى 
اربع سنين تعليم
كلية فى الاسماعيلية
اتعرفت على ناس جميلة جدا
لقيت اصحابى بجد

وخلصت الجامعة الحمد لله
ورجعت لاهلى يوم 9 يوليو 2009
ايوه انا مش كبير اوى
اصل فى ناس كتير بتدينى سن اكبر بكتير

المهم يوم 28 من نفس الشهر 
ابويا توفى
تقريبا 19 يوم 

كانت صدمة رهيبة جدا
بس مش عارف ليه كنت متماسك اوى
يمكن عشان انا كبير اخواتى
فحبيت انى امسك نفسى قدامهم

بقالى كام يوم بفكر فى حاجات كتيرة اوى
حاجات كنت محتاج فيها ابويا
ومن كام دقيقة مقدرتش امسك نفسى لما حسيت ان ابويا مات
وتقريبا دى تانى مرة انهار فيها من يوم الوفاة

يمكن اربع سنين بعيد عن البيت عودونى انى اقدر ابعد
بس كنت فى نهاية كل مدة بقدر اشوف ابويا تانى
لكن دلوقتى لما احتاجته ملقتوش

انا تعبت جدا جداحاجات كتيرة بحاول افكر فيها فى نفس الوقت
عشان مظلمش حد
لدرجة انى خليت الحاجات اللى تخصنى اخر حاجه افكر فيها
ولازم هضحى بحاجة عشان ارتاح

اوقات ناس بتشوفنى كبير فى السن
ولما اسأل ليه
يقولوا طريقة كلامك
وناس تانية تقول شكلك
بالرغم ان اوقات كتير بحس ان انا لا شىء
واحيانا طول الوقت
بس انا بقيت كدا من كتر ما الدنيا ضربت فيا

بعتذر لكل واحد او واحده صدعتهم
او ضاايقتهم بكلامى
وبعتذر لنفسى على اهتمامى بحاجات ملهاش معنى فى الزمن دا

كفاية بقى اهتمام باخبار بلد منتهية الصلاحية
كفاية احلام جميلة ولما افوق اصطدم بالمر كله
كفاية بقى انى اتأثر بحد
او ان قلبى يتحرك على شىء ميخصنيش
عايز امشى من البلد دى باسرع ما يكون

ولازم ارتب اولوياتى فى الحياة
اهم حاجه عندى اهلى دلوقتى
ونفسى اخر حاجه خالص ومن بعد نفسى تلاقى بلدى

بعتذر لكل اهل غزة عن موضوعى اللى فات 
بعتذر للغة العربية لان مش انا اللى هغير الكون
بعتذر لولى امرنا وحقنا عند ربنا
مش هاوجع دماغى تانى
وهدفن قلبى زى ماهو 
مليان بحب الاهل والاصحاب 
غير كدا مفيش

هتكلم فى السياسة بس من غير متأثر
تولع البلد باللى فيها
ومش مهم اتكلم خالص
وتولع الكورة على المنتخب
وتولع خريطة الوطن الغربى 
اقصد العربى
ويولع الاعلام الزبالة

واعتقد انى هغير اسم المدونة كمان
اخليها زقزقة ولا نكد ولا اى حاجه
شارك على ايه بس
ماللى مكتوب هنشوفه وخلاص

بعتذر على البوست دا
وعلى اى كلمة قولتها ورجعت فيها
لان انا خلاص هارجع فى كلاااام كتير اوى

ابويا انت وحشتنى اوى اوى
ربنا يرحمك ويغفرلك ويجعل قبرك روضة من رياض الجنة 
والقاك فى الآخرة باذن الله

موضوع المقال
ردود الأفعال: 
10 Responses
  1. OlivE Says:

    بما انك مضايق انا هتكلم اصلى مبحبش الناس المضايقه تكون مع نفسها :) لازم ارخم

    من شويه كنت فى الكليه وبصراحه كنت على اخرى مش طايقه حاجة وكل ما حد يكلمنى معلش انا مضيقه دلوقتى بلاش تكلمينى لحد ما فوقت لوحدى واندمجت وبدات افكر فى الاحسن وربنا يسر الحال ومش زعلت حد منى بنرفزتى

    اقصد من كلامى دا ان حاجات كتير موجوده وبضايق علشان كدا مش لازم نقف عند كل حاجة ونعيط عليها نحاول نعدى

    حال البلد اللى بتتكلم عنه حارق دم اى حد بيحبها وحاسس ان البلد دى فيها خير كتير بس منهوووووووووب بمعنى منهوب

    بتتكلم عن المسئوليه اللى شلتها
    انت قدها يا باشمهندس اه ممكن تضعف شويه بس هترجع وتقول مفيش غيرى هيقوم بدورى دا انك تكون كبير العيله دلوقتى

    اه هى بصراحه حاجة بتبقى صعبه اوى فى الاول بس بعد كدا بتتعود على المسئوليه وربنا هيعينك ان شاء الله


    //
    كفاية احلام جميلة ولما افوق اصطدم بالمر كله
    كفاية بقى انى اتأثر بحد
    او ان قلبى يتحرك على شىء ميخصنيش
    //
    اقولك احلم بس سيب جزء كدا بلاك ومش تبص ليه ولما تحصل حاجة انت مش متوقعها قول انها هى دى اللى فى المنطقه البلاك المبهمه اللى مش معروفه وطبعا دى هى الاقدار والنصيب لانها مبهمه لينا كلنا



    //
    بعتذر على البوست دا
    وعلى اى كلمة قولتها ورجعت فيها
    لان انا خلاص هارجع فى كلاااام كتير اوى
    //
    ليه بتعتذر عن البوست
    دا بلوجك وليك حق تكتب فيه كل شىء يهمك او يشغل بالك حتى لو كانت بتبين ضعفنا فعادى احنا بشر وبنضعف كتير



    //
    ابويا انت وحشتنى اوى اوى
    ربنا يرحمك ويغفرلك ويجعل قبرك روضة من رياض الجنة
    والقاك فى الآخرة باذن الله
    //

    ربنا يرحمه يارب ويدخله فسيح جناته اللهم امين .


    والحمد لله على كل حال
    معلش هقول حاجة ممكن تزعلك
    احمد ربنا ان توقيت الوفاه جت بعد ما انهيت دراستك وبقيت موجود فى وسط اهلك ودا حكمه ربنا وقدره
    انا عارفه ان تاثيرهاوحش عليك وانها صدمه بعد 4 سنين وبعد الفتره البسيطه دى من رجوعك يحصل دا بس القدر مفيش مفر منه


    بصراحه كان نفسى احكى عن جزء خاص بيا بس مش هينفع انت مش ناقص


    اسفه على الاطاله

    سلامى


  2. ماااااالك يامحمود؟؟

    ان شاء الله كله هيباه تمام وجميل,ربنا مش بيجيب حاجه وحشه وربنا يقسملك الخير يارب.

    ربنا يرحم والدك ويغفرله ويعفو عنه.دى سنة الحياه,وقلبى معاك.

    حاول تخرج من الحاله دى يامحمود.


  3. \\OlivE \\

    مفيش اى رخامة ولا حاجه دى حاجه تسعدنى

    هى مش كل حاجه بقف عندها ولا حاجه
    ياما دقت على الراس طبول
    المشكلة انها شوية افكار ومشاكل كتجمعة بقالها كتير ومش عارف انتهى منها وكل شوية فى جديد

    وحال البلد حسبى الله ونعم الوكيل فيه ومفيش فايدة

    عارفة
    المشكلة فى المسئولية انها متجددة
    مش ثابتة
    يعنى كل شوية فى حاجة جديدة بتظهر
    لازم اتحملها مع الباقى

    حلوة نظرية البلاك دى
    وفعلا كل شىء قدر ونصيب
    بس الفكرة ان اوقات بيبقى قدامنا حاجتين نختار بينهم
    وانا كنت مطالب اختار التنين مع بعض
    عشان كدا كنت مهنوق
    لانى لازم اضحى بحاجه منهم
    وهما الصراحة كانوا 3 اختيارات
    اهملت نفسى فا اتبقى اتنين :)

    انا بعتذر على البوست عشان بوست يجيب اكتئاب

    وربنا يرحم ابويا وكل اموات المسلمين
    وناس كتير قالولى نفس الكلام عن وقت الوفاة
    وهو دا يمكن اصهب حاجه حصلتلى

    مفيش اى مشكلة لو حكيتى عن نفسك
    اهو تفضفضى ومتجمعيش الافكار زيى

    ومفيش اطالة ولا حاجه
    سعيد بنصايحك
    وسلام


  4. \\ الشعب لابد له من حكومه تشكمه\\

    اهلا يا شيما
    منورانى دايما بوجودك
    والله كنت تعبان جدا يا شيما
    وعقلى وقلبى كانوا على أخرهم

    ايوه ادعيلى انا محتاج الدعوة والله
    ربنا يكرمك ويحفظك

    وربنا يرخم امواتنا جميعا

    وانا الحمد لله احسن دلوقتى
    وان شاء الله قريب هفوق تانى

    شكرا يا شيما وسلامات


  5. الحزن هو الشئ الوحيد إللى بيتولد كبير وبعدين بيصغر إن شاء الله فترة وتعدى


  6. لله الأمر من قبل ومن بعد يا بني ...مش عايزة أجدد أحزانك بس سبحان ربي أنعم عليك بأيام قضيتها مع والدك و كأن والدك كان ينتظرك ليكون معك أياما سوف يتوفاه الله القدير...رحم الله موتانا و أنعم عليك بالصبر والجلد ..


  7. اقصوصه Says:

    امممم

    سيل المشاعر اللي افرغتها بهالتدوينه

    محتاج لقعده طويييييييييييله

    الحياه غريبه

    فعلا الغريبه

    يمكن دراستك خليتك تتعود

    انك تكون بعيد عن ابوك

    لفترات غير قصيره

    بس طبعا كنت تشوفه بين الوقت والاخر

    بس الحين البعد مختلف

    بعد للابد

    ما تعتقد ان الحياه كانت تمهد لك

    عشان ماتصدمك مه وحده

    بفراق مؤبد لا رجعة فيه؟

    اكيد انته مش ولا شيء

    احساسك بالمسؤليه

    هو اكبر دليل على هالشي

    لو كنت ولا شيئ

    كنت بتقول اللهم نفسي

    بس بما انك تركت اهتمامك بنفسك

    لاخر اولوياتك وهمك

    فبالتالي انته شيء كبير

    اكيد الحياه تقسى علينا وايد

    وبين الحين والاخر تفاجأنا

    بصفحه قاسيه ومؤلمه

    بس تأكد ان كل هالظروف السيئه

    تخلق منا شخصياات

    اكثر قوه

    واكثر صلابه

    واكثر مقدره

    على مواجهة الحياه :)


  8. \\أم .. بوبه\\
    عندك حق هو فعلا بيتولد كبير
    ويارب يصغر بسرعه بقى


  9. \\ كلمات من نور \\
    فعلا زى ما يكون كان مستنينى اخلص واقعد معاه كام يوم
    الله يرحمه ويرحم اموت المسلمين جميعا


  10. \\اقصوصه\\
    اتمنى بس انى منكسرش فى الطريق دا
    وربنا يسترها
    انا اوقات كتير بفكر فى الراحة بعد التعب فى الشىء عشان اقدر اكمل

    ربنا يصلح حالنا جميعا ويهون ابتلاء الدنيا علينا

    شكرا لزيارتك


Related Posts with Thumbnails