اللهم ولى على مصر من يصلح حالها يارب العالمين
صاحب رأى


كل عام وانتم بخير


طبعا مش محتاجين اقولكم انكم وحشتونى جدا ووحشنى البلوج اوى


يااااااااااااااه بقالى كتير مدخلتش هنا


معلش الظروف بقى


كان نفسى اقضى العيد فى مصر بس الحمد لله على كل حال وان شاء الله رمضان الجاى اكون فى مصر


وحشتونى اوى والله


ناس كتير اكيد كانت منتظرانى هنا


ناس قلوبهم بيضا بجد


احب اقولهم انى دايما فاكرهم بالخير


وربنا يسعد ايامنا كلنا يارب




بصوا بقى دا اول عيد ليا هنا


كنت متعود كل عيد اقابل الناس الجميلة والطيبه اللى اتربيت بينهم


طبعا مفتقدهم جدا


كنت بصلى العيد فى الخلاء


بس هنا صعب انى اعملها




العيد هنا ببساطه خالص تروح تكبر و تصلى صلاة العيد بالمسجد ولو هتحضر الخطبه وكدا


وتروح تكلم اهلك واحبابك وبعدين تنام على طووووووووول


هو دا العيد هنا ، يبقى اللى فى مصر يحمد ربنا ويبوس ايده وش وضهر لانه فعلا عاش العيد وفرحته






وانا صورت صورة للناس بالمسجد لذكرى اول صلاة عيد ليا خارج مصر


اشوفكم على خير وعساكم من عواده وعيدكم مبارك والله نفسى اغير كلمة مبارك بس اهو قدرنا بقى يلزق فى كل حاجه




موضوع المقال 5 عدد من شاركوا برأيهم |
ردود الأفعال: 
صاحب رأى

لا تندم على حب عشته

حتى لو اصبح ذكرى مؤلمة

...

فاذا كانت الزهور قد جفت وضاع عبيرها

ولم يبقى منها غير الأشواك

فلا تنسى انها منحتك عطرا جميلا أسعدك ..

موضوع المقال 2 عدد من شاركوا برأيهم |
ردود الأفعال: 
صاحب رأى
برجاء الاهتمام بمشاهدة كلا من الفيديو الاول والثانى
ومنتظر مناقشتكم فى رأى الكاتب الامريكى اليهودى
نورمان فنكلستين






2 عدد من شاركوا برأيهم |
ردود الأفعال: 
صاحب رأى
ايه؟
حد فاكرنى ولا اتنسيت يا بشر
خلاص خلاص
عارف ان فيكم ناس محترمة لسه فاكرانى
ايوه ايوه واللى مش فاكرنى محترم بردو :)
معلش معرفتش ارد على التعليقات بجد
بس بشكركم جدا جدا
وبجد انتوا ناس متتعوضش
بجد انا كنت بحاول اكتب ولو جملة صغيره
بس بقى زى مانتوا عارفين انا لسه فى بداية مراحل الغربة
ايوه ماهى الغربة مراحل
انا بقى فى اول مرحلة
مرحلة التعب والتعب والتعب
فى المرحلة دى هتشتغل اى حاجه تتعرض عليك
واى حاجه دى مش زى مصر طبعا
بالعكس
دا احسن شغل فى مصر بيساوى فى
العائد المادى اى حاجه (اللى بتكلم عنها)
طبعا محدش هينكر ان الاسعار هنا نار مولعه
بس بالنسبه لاقل مرتبات موجوده
انت ممكن تعيش وتعيش ناس كمان
رفاهيه اجتماعيه يعنى
بس ايه بقى
تعب وارهاق اوى
حد فصيح يسألنى ليه
اقوله لان انت يا حبيبى ويا حبيبتى :)
قاعد فى بيتك
الست الوالده ربنا يخليها بتعملك كل حاجه
من اول الاكل لغاية فرش سريرك
يعنى انت مشفتش التعب
المهم انا فى انتظار الخطوه اللى بعد اى حاجه
اكيد واحد هيقولى طب ليه منتظر
اقوله يا ناس انا مش فى مصر
انا فى بلد لازم تطلع عينك عشان تقعدك يوم فيها
انما فى بلدنا مصر الحبيبه
اى حد يقدر يدخلها فى اى وقت ويقعد براحته
لسه بقى اذن عمل
ايوه لازم يسمحولك انك تشتغل فى البلد
وكمان كشف طبى
ايوه ايوه لازم يتأكدوا انك مطابق للمواصفات
احم قصدى
لازم يتأكدوا انك خالى من الفيروسات والامراض
خايفين على شعبهم طبعا
مش احنا يا حسره علينا
بيجيبولنا المرض لحد بيتنا
تفتح التليفزيون يجيلك مرض
ايوه سامعك ياللى بتنادى
تشرب من الحنفيه يجيلك مرض
وكتير وكتير
طبعا انا منقطع عن اخبار مصر
كل فين وفين على ما بسمع حاجه عن مصر
حد يقولى ليه
ايوه
هنا لو متعبتش فى الشغل
هتتعب من خبر عن مصر
يبقى اتعب فى الشغل احسن
واروح اشوف اذا كان عندى غسيل :(
ولا اى مهمه من مهام العزاب
المهم
سلمولى على مصر سلمولى
وقولولها اياك الجنيه يغلى سعره
طبعا فاهمين ليه :)
ويلا سلام بقى قبل ما صاحب الشغل يجى
:)
10 عدد من شاركوا برأيهم |
ردود الأفعال: 
صاحب رأى




السلام عليكم ورحمة الله وبركاته

مش لازم أقول ان مصر كلها وحشتنى

لأن دا شىء أكيد .

شكراً لكل مدون ولكل صديق دعا لى

ربنا يكرمكم ويصلح حالكم

على صوت كوكب الشرق اكتب اول موضوع فى غربتى

اكتر من 8 شهور مش بسمع اغانى

سمعتها مخصوص عشان احس بجو مصر

وبالمره اسمع لهجة مصرية أحسن من الهندى

الهنود هنا فى الكويت كتير جدا جدا

انا حاسس ان الهنود احتلوا الكويت من كتر ما بشوفهم

لكل بلد ريحه ولون وطعم

اه بجد مش تأليف

اول ما نزلت مطار الكويت

بقايا رائحة مصر اختفت

وتبدل الهواء المصرى بهواء كويتى

تغيرت رائحة الهواء واختلف لون المكان امام عينى

واصبح للمكان طعم آخر غير بلادى

ندخل فى نقطة الاختلافات

أولا اللهجة فى الكلام هنا صعبة جدا

يعنى اوقات واحد يكلمنى ومفهمش هو بيقول ايه

ويرد عليا ويقولى (مو تعرف عربى)

واتابعه بضحكة مع جملة "جديد بالكويت"

زى ما قلت ان الهنود منتشرين اوى

انا ساكن فى عمارة مليانه هنود

الشقة اللى جنبى هنود

أعوذ بالله على الريحة وقت ما يطبخوا

انا بكتب وحاسس بيها تانى

حاجه مقرفه فعلا

ويا سلام وانا راكب الباص بقى

كل الباص هنود وبحس بالخنقه

ولا الفلبينين ما اكثرهم

نتكلم عن نقطة مهمه كنت اسمع عنها كتير

كنت دايما اسمع ان الكويتين او العرب بصفه عامة

بيهينوا المصريين وبيكرهوا مصر

انا قابلت ناس كتير اوى من جميع الجنسيات

كويتى وسورى وفلسطينى وجزائرى

حتى الانجليز و الهنود والفلبيين

كلهم بيعاملوا المصريين باحترام وذوق

ودايما الكويتى ميتكلمش معايا الا لما يدعيلى

مثلا بيقول "يعطيك العافية"

ودايما بيكرر كلمة اخى فى كلامه معانا

ومن كام يوم اتكلمت مع واحد كويتى عن الغربة

رد على وقال

"ماهى غربة يا اخى ، نحن اخوة والكويت بلدك"

مش بنكر ان فى بعض التجاوزات

اللى بتحصل فى حق المصريين المغتربين

لكن كلها تجاوزات من الحكومات وليس الشعوب

اتكلم فى نقطة كمان

قابلت هنا واحد عربى سافر انجلترا عنده 19 سنه

طبعا بعد فتره من الزمن فى انجلترا

اخد جنسية انجليزية واعتقد انها اعظم الجنسيات الآن

لا تقولى امريكى ولا روسى

المهم هو شويه يكلمنى عربى وشويه يقلب انجليزى

الراجل دا شاف صورة ملكة انجلترا فى مجلة

تخيلوا رد فعله كان ايه !!!

قطع الصفحة اللى فيها صورة الملكة

وقعد يبوس فى الصورة وقطع حدود الصورة

وحطها فى محفظته مكان صورته

انا استغربت اوى !!!!
شافنى مستغرب فرد عليا بجملتين

"دى مش مسلمه بس جزمتها احسن منهم كلهم ، (الحدق يفهم)!!!!!"

اخر نقطة استحملونى بقى

انا عيد ميلادى كان يوم السبت 13/2 :)

(ايوه قبل عيد الحب بيوم واحد)

والحمد لله

محتفلتش لا بدا ولا بدا :)


بس كفاية عليكم كدا ، شكلكم زهقتوا

أشوفكم على خير يا احباب قلبى

والله بحبكم كلكم فى الله ، ومشتاق للقاء مدونين زى بتاع المنصورة

"سلمولى على مصر سلمولى"


12 عدد من شاركوا برأيهم |
ردود الأفعال: 
صاحب رأى

السلام عليكم يا اخى ويا اختى فى الله

بجد وحشتونى جدا جدا
ووحشتنى الفضفضة والمناقشات اللى بتزودنا معرفة وادراك للحياة .

حد بقى يسمعنى اغنية "خلاص مسافر" لشادية .
أيون خلاص مسافر
تقريبا كلها ساعات وأغادر ارض الوطن الغالى .

محتاج بجد لدعاءكم عن ظهر قلب 
مش شرط تكتب الدعاء فى الرد لمجرد المجامله
لا يا ريس ويا ريسه
ادعوا بذمة دانا جيت على نفسى وقولت اودعكم .

وان شاء الرحمن اللقاء القادم هتكلم معاكم عن اول شعور بالغربة 
وطبعا انا مش عارف امتى اقدر استخدم النت تانى .
يعنى اشوف بلوجاتكم على خير
فى رعاية الله يا مدونين ويا مصريين


14 عدد من شاركوا برأيهم |
ردود الأفعال: 
صاحب رأى
شعار الحزب الوطنى فى الفترة الأخيرة كان "من أجلك انت"
عايز اعرف من أجل مين ؟
من أجل الاسرة الحاكمة وحبايبهم
ولا كنتوا تقصدوا "هنجيب أجلك انت" للشعب المصرى كله


الباشا "كميل امه يا ناس" أحمد "عو" أقصد عز 
أكيد عز هو العز هيلاقى احسن منه ازاى
بيقترح قانون السماح بتجارة الأثار داخليا
والنبى عسل شربات يا عز
هو انت عايز تتاجر فى الاثار كمان
المصيبة لا تكون بتاجر فعلا فيها
وعايز تفتح لنفسك الباب بالقانون
يخرب عقل دا حزب على عقل البرلمان كله

مش كفاية كل يوم بقانون مخالف للدستور 
دستور باطل والشعب كله عايز يغيره 
تقوم انت وحبايبك تخترعوا القوانين اللى دستوركم رافضها

انا كنت فى الاول جاى اكتب موضوع عن الطفولة 
بس بصراحة الباشا بتاع الحديد نرفزنى اوى
فا مقدرتش امسك نفسى

ندخل فى موضوع الطفولة
وانا موجود على الفيس بوك
شفت الفيديو دا
طفل مصرى صغير السن
افتكرت الجملة اللى بتقول 
"الطفل المصرى اذكى طفل فى العالم حتى 6 سنوات"
قولت وماله اشوف الفيديو دا

والله ما عايز احرقلكم الفيديو
وعايزكم تشوفوا وتسمعوا بنفسكم
منكم اللى هيضحك ومنكم اللى هيصعب عليه حالنا
الاجيال اللى جايه اصعب واصعب
بلا عقل وبلا هدف وبلا روح 
بلا وبلا وبلا
فعلا مصوا دمنا واستحلوا عرضنا
وهم اللى فى الاصل وظيفتهم يحمونا
وبقت حاميها حراميها

انا لازلت احمل وزارة الاعلام بانها المسئولة 
عن تدنى اخلاق الشعب المصرى
لازلت احمل الاعلام المصرى مسئولية كل الفساد

كل واحد عنده طفل ياريت يراعى ربنا فيه
وربنا يستر الايام الجاية
واشوفكم على خير
واستمتعوا بالفيديو

بعتذر عن عدم ظهور الفيديو
انا رفعتلكم الفيديو على سيرفرين
مجرد انك تضغط هلى اللينك وتحمل
ورفعته على اليوتيوب كمان

للتحميل
أو
أو من اليوتيوب فى الفيديو دا




وشوفوا من الفيديو دا الفرق بين الطفل المصرى
والطفل اللبنانى الذى انكر وجود اسرائيل
شوفوا الفرق فى تربية الطفلين



دمتم بخير وفى طاعة الله


موضوع المقال 9 عدد من شاركوا برأيهم |
ردود الأفعال: 
صاحب رأى


السلام عليكم جميعا

ويارب تكونوا بخير وفى احسن حال

ندخل فى الموضوع زى كل مرة :)

احترت كتير وانا بحاول اختار عنوان للموضوع اللى عايز اتكلم فيه
واحترت اكتر فى بداية كلامى اقول ايه

كتبت كتير ومسحت كتير
بس فى الآخر قررت اكتب وزى ما تيجى

لو رجعنا لتاريخ مصر القديمة والحديثة هنكتشف شىء مشترك
هو ان لكل عصر هدف قومى لبلدنا
وكل ما الهدف يتحقق يظهر لنا هدف جديد ويتحقق بعون الله
وهكذا وهكذا الى ان وصلنا الى عصر مبارك

ايه هو هدفنا القومى فى العصر دا ؟؟؟؟؟

فى وقت من الاوقات كان هدفنا حفر قناة السويس 
وفى وقت تانى بناء السد العالى
وفى مرة كان الهدف استرجاع اراضى سيناء المحتلة من قبل اسرائيل
وأوقات النهضة بالتعليم 
واهداف ورا اهداف لشعب مصر

بس الغريبة اننا وقفنا تفكيرنا
وانتهت اهدافنا
واصبح هدفنا كلنا اننا نعيش وبس

او زى ما انا سامع واحد بعيد بيقولى هدفنا نكسب مباراة كرة قدم :)
تصدقوا فعلا دا بقى هدفنا الايام دى

حاجة تزعل وتنرفز والله
لما تبقى البلد صاحبة الحضارة اللى بيحكى عنها العالم كله
يصبح هدفها ماتش كورة او اهلى او زمالك

يمكن مش عارف اخرج كل اللى بفكر فيه
لان الافكار كتير ومشتته ما بين حاجه عامة وحاجه شخصية


فى حاجة غريبة بفكر فيها بردو
يعنى ايه كل شويه اقول انا بعمل حملة عن حاجة معينة
كل واحد يلاقى فكرة كويسة يقول اعملها حملة او جروب على الفيس بوك
وبعد كل دا ايه هدفنا وغيرنا ايه فى حالنا وحال بلدنا

من كام يوم نزلت حلقة كانت عن شباب الانترنت
لقاء معتز الدمرداش مع شباب مصرى من مدونين وصحفيين
معتز كان منبهر جدا بكل كلمة بيسمعها منهم
لدرجه انه اعتقد انهم اقلية فى البلد
مع ان انا سمعت كلام عادى جدا جدا
كل واحد قعد ينتقد البلد والحكومة
زى ما اى حد بيعمل يعنى واى حد يقدر يتكلم الكلمتين دول
المشكلة      فين اللى يسمع ويصلح وينفذ ؟؟؟؟؟؟

اننا نتكلم ونعبر عن نفسنا حاجه مهمة جدا
لكن الاهم اننا نشتغل ونعمل اكتر ما نتكلم
فى حملات جميلة جدا لان هدفها انها تعمل مش تتكلم بس
خلينا نتحرر من السلبية بقى


البلد دى محتاجة ثورة من تانى
انا شايف دا الحل الوحيد عشان نعيش عيشة كريمة
وحتى لو التصليح اخد سنين منا يبقى بنصلح للاجيال اللى جاية بعدنا

عايزين اللى جاى يبقى هدف قومى نحققة
وانا شايف ان افضل هدف قومى يبقى التغيير والاصلاح
وضرورى جدا التغيير قبل الاصلاح
تغيير جميع كوادر العاملين بالدولة من اول البعبع حتى أقل مسئول
وبداية مرحلة الاصلاح

فى ناس اتكلمت قبل كدا عن حلم وطن
وانا مش بحب احلم خالص
لان انا فعلا عندى وطن بس كل اللى ينقصه شوية جهد منا
وبشوية جهد وتعب من كل واحد بيشاركنى فى وطنى مصر
هنقدر نحقق هدفنا 
"التغيير والاصلاح"

الكلام دا كلة كتبته بروح مسئول فى البلد
كل كلمة كتبتها نفسى اسمعها من كل مسئول فى البلد
لان انا مش هاقدر اغير حاجه
الا اذا بقيت مسئول طبعا :)

دمتم بخير 
موضوع المقال 10 عدد من شاركوا برأيهم |
ردود الأفعال: 
صاحب رأى
الله يرحمك يا رجولة

زمان وآه من زمان
لما اسمع من ناس كبيرة عن أيام زمان 
أقول الله يرحمك يا رجولة


لما كان الشاويش يقول (هااااااا مين هناك)
ويرعب أى حد ماشى فى المنطقة 
أقول الله يرحمك يا رجولة
عشان دلوقتى الناس بتخاف من بعضيها
بتخاف لما تشوف حد ماشى جنيبها
انتهى الأمان والكل بقى جبان
يبقى الله يرحمك يا رجولة


لما حرامى يدخل على بيت 
وراجل البيت يخبى العيال ويقعد فى اوضته ميتحركش
لغايه ما الحرامى يخلص ويمشى
بحجة انه خايف على العيال وعلى نفسه لا الحرامى يأذيه
أقول الله يرحمك يا رجولة
من بعد ما الحرامى كان بيخاف
دلوقتى المسروق هو اللى بيخاف
يبقى الله يرحمك يا رجولة


لما اسمع عن ايام زمان
وازاى محدش كان يقدر يعاكس بنت فى الشارع
لان كل اللى ماشى فى الشارع رجالة
أقول الله يرحمك يا رجولة
لما تبص دلوقتى تلاقى الكل 
بيبص على المعاكسة ويضحك او يمشى فى حاله
واوقات البنت هى اللى بتعاكس الولد
يبقى الله يرحمك يا رجولة


لما السادات الله يرحمه 
زود تعريفه على رغيف العيش
والبلد قامت بمظاهرات و وولعوا الدنيا
لغاية ما السادات رجع فى كلامه
أقول الله يرحمك يا رجولة
لما نلاقى العيش بصعوبة واغلى كتير
لما ندفع ضريبة عن البيوت وساكتين
لما ناخد على قفانا بقالنا سنين
يبقى الله يرحمك يا رجولة


لما زمان هزمنا الاعداء
وعبرنا سينا ورجعنا كرامتنا
أقول الله يرحمك يا رجولة
لما كرامتى دلوقتى تضيع
وملناش حق فى سينا كمان
يبقى الله يرحمك يا رجولة


لما زمان كان الارتباط عباره عن كلمة رجالة
واستحالة تلاقى مشاكل هنا او هناك
أقول الله يرحمك يا رجولة
لما دلوقتى الارتباط عباره عن هتدفع كام
وكام بوسة على الماشى ويسيبها ويخلع
يبقى الله يرحمك يا رجولة

لما زمان كان للراجل هيبة فى بيته
ومراته سهرانه لغاية ما يرجع بيته
ويتعشوا وينام فى سلام
أقول الله يرحمك يا رجولة
لما دلوقتى الراجل ياخد فوق دماغه 
من بيته وشغله وكمان بينام جعان
يبقى الله يرحمك يا رجولة



آه وآه من زمان
حد يعرف ليه وصلنا لكده

انا كتبت الكلام دا كله بسبب حاجتين
اولا
موضوع ان حرامى يدخل بيتى
واخاف انى اطلع امسكه اقتله ودا من حقى
يا راجل "من مات دون ماله فهو شهيد"

تانى حاجه
لما بنت تبقى ماشيه فى الشارع
وبغض النظر عن هى لابسه ايه او مش لابسه اساسا
ليه مفيش عندنا رجولة اننا نقول لا لحد بيعاكس واحدة
يا راجل "من رأى منكم منكرا فليغيره "

الرجولة مش زى ما قال احمد ماهر بس 
"الراجل مش بس بكلمته الراجل برعايته لبيته واسرته"
لا الموضوع اكبر بكتير
لازم يكون في نخوة
وشهامة و احترام 
لازم يكون فيه شجاعة
لازم يكون في أمانة وصدق

الراجل مش بس بعلاقته الزوجية
ولا بتحمل المسئولية بس



حد يقولى بقى الراجل بايه ؟
اكيد كل واحد شايف تعريف الرجولة بشكل!
قولى على وصف الرجولة فى نظرك ؟

موضوع المقال 16 عدد من شاركوا برأيهم |
ردود الأفعال: 
صاحب رأى

مش عارف ابدأ منين
ومش عارف ابدأ ازاى
انا هاتكلم وارغى 
من غير ترتيب

انا انسان بسيط جدا
ابسط من البسط ومتواضع فى المقام 
معلش بحب الرياضيات شوية

انا بعدت عن بيتى واهلى 
اربع سنين تعليم
كلية فى الاسماعيلية
اتعرفت على ناس جميلة جدا
لقيت اصحابى بجد

وخلصت الجامعة الحمد لله
ورجعت لاهلى يوم 9 يوليو 2009
ايوه انا مش كبير اوى
اصل فى ناس كتير بتدينى سن اكبر بكتير

المهم يوم 28 من نفس الشهر 
ابويا توفى
تقريبا 19 يوم 

كانت صدمة رهيبة جدا
بس مش عارف ليه كنت متماسك اوى
يمكن عشان انا كبير اخواتى
فحبيت انى امسك نفسى قدامهم

بقالى كام يوم بفكر فى حاجات كتيرة اوى
حاجات كنت محتاج فيها ابويا
ومن كام دقيقة مقدرتش امسك نفسى لما حسيت ان ابويا مات
وتقريبا دى تانى مرة انهار فيها من يوم الوفاة

يمكن اربع سنين بعيد عن البيت عودونى انى اقدر ابعد
بس كنت فى نهاية كل مدة بقدر اشوف ابويا تانى
لكن دلوقتى لما احتاجته ملقتوش

انا تعبت جدا جداحاجات كتيرة بحاول افكر فيها فى نفس الوقت
عشان مظلمش حد
لدرجة انى خليت الحاجات اللى تخصنى اخر حاجه افكر فيها
ولازم هضحى بحاجة عشان ارتاح

اوقات ناس بتشوفنى كبير فى السن
ولما اسأل ليه
يقولوا طريقة كلامك
وناس تانية تقول شكلك
بالرغم ان اوقات كتير بحس ان انا لا شىء
واحيانا طول الوقت
بس انا بقيت كدا من كتر ما الدنيا ضربت فيا

بعتذر لكل واحد او واحده صدعتهم
او ضاايقتهم بكلامى
وبعتذر لنفسى على اهتمامى بحاجات ملهاش معنى فى الزمن دا

كفاية بقى اهتمام باخبار بلد منتهية الصلاحية
كفاية احلام جميلة ولما افوق اصطدم بالمر كله
كفاية بقى انى اتأثر بحد
او ان قلبى يتحرك على شىء ميخصنيش
عايز امشى من البلد دى باسرع ما يكون

ولازم ارتب اولوياتى فى الحياة
اهم حاجه عندى اهلى دلوقتى
ونفسى اخر حاجه خالص ومن بعد نفسى تلاقى بلدى

بعتذر لكل اهل غزة عن موضوعى اللى فات 
بعتذر للغة العربية لان مش انا اللى هغير الكون
بعتذر لولى امرنا وحقنا عند ربنا
مش هاوجع دماغى تانى
وهدفن قلبى زى ماهو 
مليان بحب الاهل والاصحاب 
غير كدا مفيش

هتكلم فى السياسة بس من غير متأثر
تولع البلد باللى فيها
ومش مهم اتكلم خالص
وتولع الكورة على المنتخب
وتولع خريطة الوطن الغربى 
اقصد العربى
ويولع الاعلام الزبالة

واعتقد انى هغير اسم المدونة كمان
اخليها زقزقة ولا نكد ولا اى حاجه
شارك على ايه بس
ماللى مكتوب هنشوفه وخلاص

بعتذر على البوست دا
وعلى اى كلمة قولتها ورجعت فيها
لان انا خلاص هارجع فى كلاااام كتير اوى

ابويا انت وحشتنى اوى اوى
ربنا يرحمك ويغفرلك ويجعل قبرك روضة من رياض الجنة 
والقاك فى الآخرة باذن الله

موضوع المقال 10 عدد من شاركوا برأيهم |
ردود الأفعال: 
صاحب رأى
السلام عليكم جميعا
وبالسلام نعيش نحن المسلمون
وبالسلام نعيش نحن المصريون
مسلما ومسيحيا

مصر الآن فى اصعب حالاتها
على مر العصور
مرض وتفشى بيننا
أخطر من أنفلونزا الطيور والخنازير

مرض نعم ومرض لا

هناك من يقول لولى أمره نعم دائما
وهناك من يقول لا دائما
وهذا خطأ وهذا خطأ

هذا يتبع ولى الأمر فى كل شىء
حتى الظلم 
ويكون فى غالب الأحوال
من الحاشية ورجال الأعمال
والآخر صاحب كلمة لا
دائما ما يكون معارض
فقط يقول لا اعتراضا على ادنى الأشياء
مجرد لا
يستريح بقولها
يعتقد انه عندما يقول لا
فاننا سنصفق له
سنفرح بانه يوجد من يقول لا

ولكن

هذا البلد لا يحتاج من يقول
لا أو نعم دائما
هذا البلد يحتاج الى التفكير قبل القول والفعل

فليس من العيب ان اقول نعم على شىء أراه صحيح
وانا اساسا من المعارضة
وليس من العيب ايضا ان اقول لا
على شىء اعلم انه غير صحيح
وانا من الحكومة او ما شابه ذلك

قضايا كثيرة تثار
دائما ما نجد المعارضة تعارض
على كل شىء تقترحه الحكومة
واستعجب كثيرا عندما اجد ان الحكومة
تسير على الطريق الصحيح
ولا زالت المعارضة تقول لا

دائما ما اجد رجال الأعمال
أقصد الحكومة بالطبع
اجبارى عليهم ان يوافقوا على كل شىء يطرح
لا يوجد بينهم من يقول لا

قضية الجدار الفولاذى
ولا اعلم كيف تم تحديده فولاذيا
لماذا كل هذه الضجة
من يقول نعم لحماية اراضينا
ومن يقول لا لعدم حصار غزة

أين الصواب
أين الخطأ
لابد من وجود صائب وخاطىء بينهما

"أنا أفكر اذا انا موجود"
فلسفة قديمة ينتقدها بعض علماء الدين
ولكن اذا تم تحليلها
انت تفكر بمعنى ان لك عقلا
لذلك فانك انسان
لذلك فانت ستحاسب بين يدى الله 
على ما تقترفه يدك

لذلك فانه بعد تفكير عميق
وجدت انى مع السيادة المصرية
بمعنى
انه ليس من شأن أحد 
ما تفعله مصر على أراضيها
طالما اننا لم نضره
"أنت حر مالم تضر"

هناك من يقول اننا نزيد الحصار
كيف يا أخى؟
سيقول بمنعنا لوجود الانفاق التى تدعم اخواتنا
بالمؤن والسلاح وما شابه
*المؤن يا اخى دائما ما تدخل لغزة عن طريق المعابر
وهذا حقهم علينا
ولكن ليس من حقهم علينا ان نسمح بوجود مثل هذه الأنفاق
لان هذه ارض مصرية
أرض نملكها نحن
ليست أرض تهريب
ليست أرض يدخلها من يشاء ويخرج منها من يشاء
وقتما شاء

لا نعلم هل تهرب الاشياء خارج مصر
ام الى داخل مصر؟
هل ما يهرب سلاح لافراد داخل مصر ام خارج مصر؟
هل تملك جواب لمثل هذه الاحتمالات؟
 
هل تعلم ان عمليات التهريب لا تقتصر على غزة فقط؟
ولكن توجد عمليات تهريب تتم على
حدود الأراضى المحتلة .

لماذا دائما ما نسير مع التيار ولا نفكر؟
انا لا اسير مع التيار
انا دائما افكر
فكر يا أخى قليلا

أأصبحنا نحن الأعداء هذه الأيام؟
لمجرد ظهور كلمة مصرى فى اى منتدى
نجد السباب هنا وهناك
لماذا ؟
من وقف بجانبهم غيرنا ؟
انا اقصد كل العرب

لا توجد مشكلة  الا وتجد مصر لها كلمة فيها
يطلبون مننا الدعم والنجدة احيانا
ويطلبون التهدئة عن طريقنا احيانا
وعندما يريدون ان يتصالحوا تجدنا الوسيط 

الجدار العازل
لا يخص الا مصر والمصريين
فأنا معه
لأنه سيمنع تهريب المخدرات والاسلحة لمصر
الى افراد يهددون امننا وشبابنا
وكلنا نعرف ان اسرائيل تريد ان نتحول الى مدمنين
وان ما يدخل مصر من مخدرات
يدخل عن طريق الحدود الشرقية
مع غزة واسرائيل

عندما قتل الظابط المصرى على الحدود مع غزة اثناء الحرب
هل هذا ما نجنيه نحن المصريين ؟
هل كان يسمح لهم بهجرة اراضيهم وان يأخذوا ارضنا
وان يفرطوا فى أرضهم؟


كثير منا يعلم مخطط اليهود لتهجير اهالى غزة الى سيناء
اهذا ما نريد؟

عندما تقول حماس بأنها تريد 
توقيع المصالحة خارج مصر
هل يعتقدوا اننا سنهتز
لا والله
بل سنقول اذهبوا الى مكان ساندكم مثلما فعلت مصر
ولن تجدوا
وسوف ترجعون مرة أخرى الينا تتوسلون
وسنظل دائما يد العون لكم

عندما اقول رأيى عن هذا الموضوع
فى احد المجموعات على"الفيسبوك"
يأتى من يرسل الى برسالة خاصة
ويسبنى ويسب مصر والمصريين
وهذا كان رأيى 
"ان ما تفعله مصر سيادة مصرية على اراضيها
ولا دخل فى ذلك لغير المصريين"

أنا مع الجدار
ولكنى ضد غلق المعابر
أنا لست معارض على كل شىء بدون تفكير
أنا لست الا انسان مسلم مصرى عربى
أفكر ولا زلت أفكر
وسأموت وأنا افكر


فكر واكتب رأيك وشارك
لن تجد هنا من يسبك لمجرد رأي

موضوع المقال , 3 عدد من شاركوا برأيهم |
ردود الأفعال: 
Related Posts with Thumbnails