اللهم ولى على مصر من يصلح حالها يارب العالمين
صاحب رأى


السلام عليكم جميعا

ويارب تكونوا بخير وفى احسن حال

ندخل فى الموضوع زى كل مرة :)

احترت كتير وانا بحاول اختار عنوان للموضوع اللى عايز اتكلم فيه
واحترت اكتر فى بداية كلامى اقول ايه

كتبت كتير ومسحت كتير
بس فى الآخر قررت اكتب وزى ما تيجى

لو رجعنا لتاريخ مصر القديمة والحديثة هنكتشف شىء مشترك
هو ان لكل عصر هدف قومى لبلدنا
وكل ما الهدف يتحقق يظهر لنا هدف جديد ويتحقق بعون الله
وهكذا وهكذا الى ان وصلنا الى عصر مبارك

ايه هو هدفنا القومى فى العصر دا ؟؟؟؟؟

فى وقت من الاوقات كان هدفنا حفر قناة السويس 
وفى وقت تانى بناء السد العالى
وفى مرة كان الهدف استرجاع اراضى سيناء المحتلة من قبل اسرائيل
وأوقات النهضة بالتعليم 
واهداف ورا اهداف لشعب مصر

بس الغريبة اننا وقفنا تفكيرنا
وانتهت اهدافنا
واصبح هدفنا كلنا اننا نعيش وبس

او زى ما انا سامع واحد بعيد بيقولى هدفنا نكسب مباراة كرة قدم :)
تصدقوا فعلا دا بقى هدفنا الايام دى

حاجة تزعل وتنرفز والله
لما تبقى البلد صاحبة الحضارة اللى بيحكى عنها العالم كله
يصبح هدفها ماتش كورة او اهلى او زمالك

يمكن مش عارف اخرج كل اللى بفكر فيه
لان الافكار كتير ومشتته ما بين حاجه عامة وحاجه شخصية


فى حاجة غريبة بفكر فيها بردو
يعنى ايه كل شويه اقول انا بعمل حملة عن حاجة معينة
كل واحد يلاقى فكرة كويسة يقول اعملها حملة او جروب على الفيس بوك
وبعد كل دا ايه هدفنا وغيرنا ايه فى حالنا وحال بلدنا

من كام يوم نزلت حلقة كانت عن شباب الانترنت
لقاء معتز الدمرداش مع شباب مصرى من مدونين وصحفيين
معتز كان منبهر جدا بكل كلمة بيسمعها منهم
لدرجه انه اعتقد انهم اقلية فى البلد
مع ان انا سمعت كلام عادى جدا جدا
كل واحد قعد ينتقد البلد والحكومة
زى ما اى حد بيعمل يعنى واى حد يقدر يتكلم الكلمتين دول
المشكلة      فين اللى يسمع ويصلح وينفذ ؟؟؟؟؟؟

اننا نتكلم ونعبر عن نفسنا حاجه مهمة جدا
لكن الاهم اننا نشتغل ونعمل اكتر ما نتكلم
فى حملات جميلة جدا لان هدفها انها تعمل مش تتكلم بس
خلينا نتحرر من السلبية بقى


البلد دى محتاجة ثورة من تانى
انا شايف دا الحل الوحيد عشان نعيش عيشة كريمة
وحتى لو التصليح اخد سنين منا يبقى بنصلح للاجيال اللى جاية بعدنا

عايزين اللى جاى يبقى هدف قومى نحققة
وانا شايف ان افضل هدف قومى يبقى التغيير والاصلاح
وضرورى جدا التغيير قبل الاصلاح
تغيير جميع كوادر العاملين بالدولة من اول البعبع حتى أقل مسئول
وبداية مرحلة الاصلاح

فى ناس اتكلمت قبل كدا عن حلم وطن
وانا مش بحب احلم خالص
لان انا فعلا عندى وطن بس كل اللى ينقصه شوية جهد منا
وبشوية جهد وتعب من كل واحد بيشاركنى فى وطنى مصر
هنقدر نحقق هدفنا 
"التغيير والاصلاح"

الكلام دا كلة كتبته بروح مسئول فى البلد
كل كلمة كتبتها نفسى اسمعها من كل مسئول فى البلد
لان انا مش هاقدر اغير حاجه
الا اذا بقيت مسئول طبعا :)

دمتم بخير 
موضوع المقال
ردود الأفعال: 
10 Responses
  1. انا استغربت الكلام
    واللي استغربته فعلا انك كاتبه بروح مسئول
    وبتقول ها تغير لو بقيت مسئول

    ماهو لو ها تغيير مش ها تبقى مسئول
    اهم شيء في المسئول اللي مش مسئول ان تمشي في ركاب القافلة
    بلا رأي
    وتهري ايدك تصقيف
    ربنا يصلحها


  2. الكلام دا كلة كتبته بروح مسئول فى البلد
    كل كلمة كتبتها نفسى اسمعها من كل مسئول فى البلد
    لان انا مش هاقدر اغير حاجه
    الا اذا بقيت مسئول طبعا :)


    بس برده مش تولى منصب أو مسئوليه هو الحل الوحيد أو الشرط الوحيدة للقدرة على الإصلاح


  3. مش انا قلتلكم مسكوني الحكم فى الصين يعنى

    وانا اشهيصكم

    ههههههههههههههههههههه

    انا بقالي ساعه ونص باتناقش فى موضوع البوست بتاعي مع جوزي وفى الاخر توصلنا لحاجه واحده

    وهى الى دايما بنختم بها كلامنا

    انا مافيش حد فى البلدي مسؤل عنها اصلا

    ما حدش بيفكر فينا احنا مش مهم


  4. Sharm Says:

    هتغيري ايه بس

    نغير نفسنا الاول


  5. \\ ستيته حسب الله الحمش \\
    لا متستغربيش الكلام
    مجرد انى تمنيت اسمع الكلام دا من حد فى البلد بجد
    واعتقد ان مش كل مسئول فى البلد فاسد
    فى ناس كويسه بجد
    لان لو مفيش ناس كويسه مكنتش فضايح الحكومة ظهرت قدامنا وبنعرفها

    ومعتقدش ان حد يقدر يغير الا اذا كان مسئول فى البلد

    وربنا يصلحها
    نورتينا


  6. \\أم .. بوبه\\

    طب قوليلى تقدرى تصلحى ازاى فى بلد دستورها ماشى لحزب حاكم بس
    ازاى هتقدرى تغيرى فى البلد وانتى فى حالة طوارىء
    ازاى فى وسط الظلم والقهر دا حد تانى يقدر يغير غير مسئول ؟


  7. \\ صبرني يارب\\
    هههههههههههه
    انا فعلا قريت موضوعك
    وعندى تعليق هكتبه هناك دلوقتى

    بس صدقينى هانت وقربت تتصلح الامور
    بس احنا نقف ورا الحق وبلاش نقول دول شبعوا واللى نعرفه احسن من اللى منعرفوش


  8. \\Sharm\\
    انا عايز اقولك حاجه بمناسبة التغيير

    مفيش حرامى بيخلف دكتور ولو حصل تبقى حالة شاذة
    عايز تغير بجد
    يبقى تغير من الجذر
    يعنى رئيس محترم وبيحافظ عليك
    هيجيبلك رئيس وزرا زية وكل واحد بيخلى اللى تحت منه زية بالظبط
    لكن بص على المنظومة دلوقتى تلاقى اللى تحت زى اللى فوق بالظبط حرااااااااااااااامى


  9. sal Says:

    الحمد لله انه فى ناس بتحاول زيك
    لك تقديرى


  10. \\sal \\

    لك تقديرى يا اخى على تشجيعك وزيارتك الاولى هنا
    ويارب كلنا نحاول


Related Posts with Thumbnails