اللهم ولى على مصر من يصلح حالها يارب العالمين
صاحب رأى

وكالعادة

دخلت النت اشوف اخبار الدنيا ايه

اشوف اخبار قديمة على اخبار جديدة

استغربت جدا

الاخبار زى ماهى مفيش تغيير

 

الزمالك زى ماهو فى النازل

والاهلى زى ماهو متصدر الدورى

 

خبر جامد جدا

تقرير للكونجرس: مصر والسعودية وتركيا

قد يسعون لامتلاك السلاح النووي

بسبب إيران وإسرائيل

حاجه تموت من الضحك

مصر و نووى

ووقتها افتكرت الجملة اللى قالها الفنان رضا حامد

فى فيلم الحب كدا

وهو واقف امام القاضى

وبيقول كلام مش مفهوم وفى وسط الكلام قال

مصر دى جامدة

اه والله فعلا عندك حق

مفيش اجمد من كدا

 

والطريف لما تشوف بقى تعليقات الناس

واحد بيقول مصر عندها نووى

بس هى مش غبيه عشان تعلن عن دا

واحد آخر بيقول هههههه مستحيل

عمرنا ماهنشوف مصر فيها نووى

اكننا بالظبط بنقول مصر تاخد كاس العالم

اقصد توصل كاس العالم

 

تعالى نشوف خبر تانى

 منظمة حقوقية مصرية

تؤكد في تقرير مشترك

ان مصر باتت دولة بوليسية

لا حول ولا قوة الا بالله

هو دا محتاج تقرير اصلا

من شهر اكتوبر 1981

واحنا عايشين بقانون الطوارىء

من اول ما مسكها مولانا حسنى باشا مبارك

كل مصلحة الوقتى لازم يتدخل فيها الأمن والداخلية

حتى مساجد الله بيقفلوها فى غير اوقات الصلاة

حتى المساجد يا ظلمة ، ارحمونا بقى

دى بيوت الله يعنى لكل البشر

فى اى وقت وفى كل مكان

عندهم حق يستهزأوا بينا ويمنعوا بناء المئاذن

فى سويسرا

 

وكان فى اختلاف فى التعليقات

واحد يقول لأ مش دولة بوليسية

لأ مش دولة بوليسية

لأنها مش دولة أصلاً.

قولوا تكيّه عزبه بنك مالوش صاحب ..

إنما دولة دي لها مقومات

و أساس مش عندنا من أصله

وغيره يقول بلاش مبالغة وظلم للحكومة 

 

تعالى لخبر ثالث 

الجمل: تخصيص 493 مليون جنيه لبناء المدارس

وصيانتها قبل نهاية العام المالى الحالى

يا جمل يا جمل

علمتنا الصبر والله

صبرنا عليك كتير

بداية من امتحانات الطلبه لامتحانات الكادر

بس يا سيادة الوزير

فى المدارس كانوا بياخدوا مننا فلوس عشان الصيانه

وتبرعات ، ولو حد كسر حاجه يصلحها

مين بقى عايز يحط فى جيبه المره دى

الفلوس دى هتروح فين

هل هتروح فى مكانها الصح ولا فى جيب مين

كفايه يا ناس بقى هو فعلا بنك من غير صاحب

دى المدرسة اللى كنت فيها قربت تقع يا ناس

 

تعالى لخبر رابع

الجبلى : 450 جنيها فقط قيمة اجراء التحاليل

لانفلوانزا الخنازير بالمعامل الخاصة

بعد الخبر دا يا جبلى بيه فى لسه معامل بالمجان

ولا الموضوع هيتقلب تجارة 

يا راجل بتتكلم عن المبلغ دا كانه سهل اوى

اى موظف يستنى شهرين 

مرتب شهرين عشان يعمل تحاليل

ايه الظلم دا

ارحمونا بقى

اعملوا حساب للشعب الغلبان

والله يا حكومة مش كل الشعب رجال اعمال زيكم

انتوا مش كتير والله

بس عشان مش بتشوفوا غير بعض

متعرفوش حاجه عن الشعب الغلبان دا

بقولك ايه يا جبلى بيه

يا نعيش عيشة فل يا نموت احنا الكل 

انا بدعو كل واحد يتصاب بالمرض

و مش لاقى تمن العلاج

انه يلف فى كل الشوارع الراقية

و يعطس فى كل حته

خصوصا على ابواب العمارات

اللى بيسكنها رجال الاعمال

او مسئولين الحكومة

 هى دى الطريقة اللى هتخليهم يهتموا بعلاج الناس

 

انا قولت رأيى 

تقدر تقول رأيك انت كمان 

هل تملك رأى لتقوله ؟

 

موضوع المقال ,
ردود الأفعال: 
9 Responses
  1. يانهارى دا انا عندى راى ااااااااااد كده,
    :)

    مصر عندها نووى ومخبيه هههههههههههههههه اكتر نكته بسمعها وتضحكنى ان مصر عاوزه يكون عندها نووى.
    دخنا معرفناش فى محرقة بنى سويف نامن مسرح صغير والناس اتحرقت جوه,مجلس الشعب اتحرررررررق,المسرح القومىىىى اتحرررررررررق,,

    فاضل بس ابو الهول يتسرق ونباه كده عملنا كل حاجه فى الدنيا.

    وبعد دا كله عاوزين نووى طب افرض واحد من اخوانا الحراس بتوع النووى وانت عارف اد ايه احنا منضبطين فتح ماسوره غلط,,,ولا المجرم الهارب الطليق اللى اسمه ماس كهربى تسلل للمفاعل بتاعنا:)

    ياماشاء الله علينا هننجح فى اللى فشل فيه العالم هنبيد اسرائيل ونبيد معاها منطقه الشرق الاوسط:))

    تصدق هنجنن وقتها وبعد كده امريكا هتشغلنا لو سألتك انت مصر تقولى ايه تقولى مصرى وابن مصرى :))

    اخبارك جميله ومتماشيه مع حال المدونين كلهم عندهم اكتئاااااااب:))


  2. \\ياماشاء الله علينا هننجح فى اللى فشل فيه العالم هنبيد اسرائيل ونبيد معاها منطقه الشرق الاوسط:))\\

    والله انتى رهيبه وبتعرفى تخلي الواحد يضحك

    وحلو رأيك فى النووى المصرى


    وموضوع الاكتئاب بصراحة مش غريب
    الناس زهقت من كل حاجه
    مفيش جديد والله
    كل حاجه بتحصل كئيبة
    مفيش اى خبر حلو ابدا
    نفسى اشوف مثلا

    تصدقى من كتر اللى نفسى اشوفه مش قادر اركز فى حاجه واحده
    ههههههههههه

    عارفه هنتفك شويه لما كاس افريقيا يقرب

    سياسة الهاء الشعب جايه فى الطريق وكله هيبقى تمام ان شاء الله


  3. OlIvE TrEe Says:

    والله
    مفيش راى ولا رد بعد اللى قولته

    ردك دا جامد جدا يا باشمهندس
    فعلا احنا يا بيحطولنا منوم فى كل حاجة علشان نتكتم يا بيلهوا الناس بحاجات تانيه فارغه ملهاش اى لازمه

    حاجات كتير كدا عارفين ان الناس هتجرى عليها وهتنسى كل حاجة مولعه ويكتروا فيها اعلانات وووو


    نوى ايه بس اللى بيقولوه
    هما عارفين يوفروا كهرباء وصرف صحى للناس
    لما فى ناس لحد دلوقتى فى قرى مش لاقيه النور ولا الصرف الصحى


    احنا بلددنا دى فيها العجب
    من كل لون تلاقى
    وكل واحد بيغنى على ليلى بتاعته لحد ان شاء الله ما هتخرب اكتر ما هى خربانه


    سورى فى الرد

    تقبل ردى
    سلامى


  4. خروب Says:
    أزال المؤلف هذا التعليق.

  5. خروب Says:

    وانبي انا عتريس ... وانبي انا سفاح .. وانبي انا جتال جوتله

    يا فندم احنا مش من 1981 احنا من ايام عتريس وفؤاده واحنا في قمع وقرف وذل وبدل شيء من الخوف بقت أشياء للخوف والهم والنكد .

    في انتظار تشريفكم لنا في مدونتنا " شيش وإزاز" - مدونة تحت التوضيب

    فوتك بالعافية

    :))
    وعلى فكرة مصر اجمد من رغيف العيش المدعم

    سلام


  6. \\OlIvE TrEe said...

    \\احنا بلددنا دى فيها العجب
    من كل لون تلاقى\\

    عجب العجاب والالوان ميكس كمان :)

    \\وكل واحد بيغنى على ليلى بتاعته لحد ان شاء الله ما هتخرب اكتر ما هى خربان\\

    ربنا يسترها

    \\سورى فى الرد

    تقبل ردى
    سلامى\\

    العفو على ايه
    رأيك مهم جدا ليكى قبل ما يكون ليا

    وسلامى انا كمان :)


  7. \\خروب said...

    \\وانبي انا عتريس ... وانبي انا سفاح .. وانبي انا جتال جوتل\\

    تشرفنا بيك

    \\يا فندم احنا مش من 1981 احنا من ايام عتريس وفؤاده واحنا في قمع وقرف وذل وبدل شيء من الخوف بقت أشياء للخوف والهم والنكد .\\

    عندك حق ودا اللى خلى الناس تحن للملكية بعد وفاة الاميرة فريال

    \\في انتظار تشريفكم لنا في مدونتنا " شيش وإزاز" - مدونة تحت التوضيب

    فوتك بالعافي\\
    ان شاء الله هنزورك
    والله يعافيك

    \\وعلى فكرة مصر اجمد من رغيف العيش المدعم

    سلام\\
    طبعا مصر دى جامدة
    كل دا ولسه مستحملة

    وسلام


  8. ههههههههههههههه

    هو ايه حكايه التشاؤم الى في كل الدنيا ده

    مفيش حد متفائل خالص ولا ايه

    ههههههههههههههههههه

    يا نعيش عيشة فل يا نموت احنا الكل
    يا نعيش عيشة فل يا نموت احنا الكل
    يا نعيش عيشة فل يا نموت احنا الكل
    يا نعيش عيشة فل يا نموت احنا الكل

    .....

    ادام انت كاتب كده

    يبقي اكيد اكيد طول ما انت هنا في مصر

    يبقي هنموت اكيد احنا الكل


  9. \\spiderman ( المدونه الإسلاميه ) said...

    \\هو ايه حكايه التشاؤم الى في كل الدنيا ده

    مفيش حد متفائل خالص ولا ايه\\

    اولا منورنا
    ثانيا اعتقد انه مش تشاؤم هو احباط ويأس من الاوضاع اللى حوالينا

    التشاؤم لو الدنيا كويسه لكنها اساسا متنيله بنيله

    \\يبقي اكيد اكيد طول ما انت هنا في مصر

    يبقي هنموت اكيد احنا الكل\\

    والله انا مستعد انى اموت لو الناس اللى بيمصوا فى دمنا هيموتوا معايا

    ومنورنا كمان مره


Related Posts with Thumbnails